Azərbaycan, Bakı, 15 yanvar/ Trend , müxbir Ü.İsmayılova/ "Torpaq sahələrinin yalnız Azərbaycanın Dövlət Torpaq və Xəritəçəkmə Komitəsinin müsabiə və hərracları yolu ilə satılması və icarəyə verilməsi ölkənin torpaq bazarında qiymətlərə təsir göstərməyəcək", - Komitənin sədri Qərib Məmmədov bildirib. Bu müddəa ötən ilin sonunda qüvvəyə minib.
"Torpaq sahələrinin qiymətləri, indi olduğu kimi, bazar tərəfindən tənzimlənəcək", - Məmmədov deyib.
Onun sözlərinə görə, Komitənin səlahiyyətlərinə yalnız torpaq sahəsinin normativ qiymətinin müəyyən edilməsi [qiymətləndirmə vergi qanunvericiliyinə müvafiq aparılır] daxildir.
Azərbaycan prezidentinin 2008 - ci il 10 dekabr tarixli fərmanına əsasən, bundan sonra yerli özünüidarəetmə orqanlarının [bələdiyyələrin] torpaqları yalnız hərrac və müsabiqələr vasitəsilə satılacaq, onların keçirilməsi üzrə səlahiyyət Dövlət Torpaq və Xəritəçəkmə Komitəsinə verilib. Əvvəllər bələdiyyələrin belə səlahiyyəti olub.
Bələdiyyə torpaqları üzrə hərracların qalibi ilə müqavilə mülki və torpaq qanunvericiliyinə müvafiq olaraq, 20 gündən gec olmayaraq, Dövlət Torpaq və Xəritəçəkmə Komitəsinin yerli qurumları ilə bağlanılır.
Müəlliflə əlaqə saxlamaq üçün elektron ünvan: [email protected]
