Azərbaycan, Bakı, 21 yanvar/ Trend , müxbir N.İsmayılova/
Azərbaycanın Dövlət Sosial Müdafiə Fondu (DSMF) 2008 - ci ilin yekunları üzrə inflyasiyanın rəsmi səviyyəsini nəzərə alaraq, cari ildə əmək pensiyalarının indeksləşdirmə prosesinin aparılması təkliflərini hazırlayacaq, - DSMF-in Sığorta - Pensiya Siyasəti və Strateji Araşdırmalar Departamentinin direktoru Elman Mehdiyev çərşənbə günü bildirib.
"Əmək pensiyalarının sığorta hissəsinin indeksləşdirilməsi müvafiq icra hakimiyyətinin Dövlət Fondunun apardığı hesablamalar əsasında qərarından sonra aparılacaq", - Mehdiyev vurğulayıb.
2009-cu ildə yalnız pensiyaların sığorta hissəsinin deyil, Sosial Fondda sığorta olunanların pensiya kapitalının da indeksləşdirilməsini aparmaq planlaşdırılır.
"İllik indeksləşdirmə işləyənlərin ödədikləri məcburi sosial sığorta üzrə ayırmaları da əhatə edəcək ki, bu da gələcəkdə yüksək pensiya müavinətlərinin hesablanmasına şərait yaradacaq", - Departament direktoru bildirib.
Ümumilikdə respublika üzrə orta əmək pensiyası 96 manat, pensiyanın baza hissəsinin minimal ölçüsü 75 manat təşkil edir. Bu göstəricilər arasında fərq əmək pensiyasının sığorta hissəsini təşkil edir.
"İbəil Azərbaycanda pensiya ödəmələri artır. Bu ödəmələr inflyasiyanın nəzərə alınması ilə əmək pensiyalarının baza və sığorta hissəsinin artırılması və indeksləşdirilməsini nəzərdə tutan xüsusi indekslərin köməyi ilə hesablanır", - Mehdiyev əlavə edib.
Bu sistem 2006-cı ilin yanvarından fəaliyyət göstərir. Və hər il pensiyaların baza və sığorta hissəsi artır, onların indeksləşdirilməsi aparılır. Bu, bazar iqtisadiyyatı şəraitində pensiyaçıları inflyasiyanın təsirindən qorumağa imkan verir.
Yanvarın 21 - nə olan cari mübadilə məzənnəsi -- 0,8045 AZN/USD.
Müəlliflə əlaqə saxlamaq üçün elektron ünvan: [email protected]