Azərbaycan, Bakı, 12 fevral / Trend , müxbir Ü.İsmayılova/ Yaponiya hökuməti tərəfindən Azərbaycan Kənd Təsərrüfatı Nazirliyinə təqdim olunacaq 3,4 mln. dollar həcmində qrant hesabına kənd təsərrüfatı texnikası alınacaq. Bu barədə cümə axşamı kənd təsərrüfatı naziri İsmət Abbasov bildirib.
"Taxıl yığımı üçün kombaynlar alınacaq", - deyə nazir bildirib.
Onun sözlərinə görə, razılaşmaya əsasən, Yaponiya tərəfi texnikanı özü alacaq və sonradan fermerlər arasında paylamaq üçün Kənd Təsərrüfatı Nazirliyinə təqdim edəcək. Layihə "2 KR" adlanır və aztəminatlı fermerlər üçün nəzərdə tutulub.
Qrantın ayrılması barədə saziş yanvarın 30-da imzalanıb. Sənədi Azərbaycan tərəfindən kənd təsərrüfatı naziri Abbasov, Yaponiya tərəfindən isə bu ölkənin Azərbaycandakı səfiri Masamitsu Oki imzalayıb.
Yaponiya 1998-ci ildən Azərbaycanda yeni layihə də daxil olmaqla fermerlər üçün 27 mln. dollar həcmində səkkiz qrant proqramı həyata keçirib. Yekunda 232 ədəd taxılyığan kombayn və 345 ədəd müxtəlif kənd təsərrüfatı texnikası alınıb.
Nazir bildirib ki, 2008-ci ilin payızında ölkədə 800 min hektar torpaq sahəsində taxıl əkini həyata keçirilib, nəticədə ölkənin ərzaq taxılına tələbatını tam təmin etmək üçün kifayət edəcək 1,6 mln. ton məhsul gözlənilir.
Məqalə müəllifi ilə əlaqə ünvanı - [email protected]
