Azərbaycan, Bakı, 13 fevral/ Trend , müxbir Ü.İsmayılova/ Azərbaycanın Daşınmaz Əmlakın Dövlət Reyestri Xidməti Dünya Bankı ilə birgə "Daşınmaz əmlakın qeydiyyatı" layihəsinin reallaşdırılması çərçivəsində Bakıda "gecəqondu"ların inventarlaşdırılmasına hazırlaşır. Bu barədə Azərbaycanın Daşınmaz Əmlakın Dövlət Reyestri Xidməti Aparatının rəhbəri Gülhüseyn Kazımov bildirib.
"Gecəqonduların inventarlaşdırılması onların reyestrə daxil edilməsini və ya sökülməsini ifadə etməyəcək və bu, əksər hallarda əhali tərəfindən səhvən əmlakın qeydiyyatı kimi qəbul olunur", - deyə Kazımov vurğulayıb.
Onun sözlərinə görə, son vaxtlar Dövlət Xidmətinə əhali tərəfindən şikayətlər daxil olur ki,
özlərini bələdiyyə orqanları və qiymətləndirmə şirkətlərinin nümayəndələri kimi təqdim edən şəxslər ev sahiblərindən əmlakın qiymətləndirilməsi xidmətinə görə pul tələb edirlər. Kazımov bu şikayətlərlə bağlı bildirib ki, əslində inventarlaşdırma layihəsi yalnız "gecəqondu"ların tikinti qaydalarına, şəhərtikinti normalarına müvafiqliyi, qaz xətləri və ya yüksək voltluq elektrik xətləri altında tikilməsinin müəyyən edilməsi məsələlərini özündə birləşdirir.
"Azərbaycanda "gecəqondu"ların qeydiyyatı və ya sökülməsi qanun ilə tənzimlənir və onların inventarlaşdırılması nə qeydiyyat, nə də onların sökülməsi demək deyil", - deyə Kazımov söyləyib.
Onun sözlərinə görə, inventarlaşdırma Dünya Bankı ilə birgə həyata keçirilən layihə çərçivəsində və DB-nin maliyyələşdirilməsi hesabına reallaşdırılır və ona görə də işlərin aparılması üçün əhalidən pul tələb olunmur.
Azərbaycan hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıblar. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 mln. dollar təşkil edir. Bunun 30 mln. dolları DB-nin kreditinin payına düşür. Kredit ehtiyatları beş il güzəştli dövr olmaqla 20 il müddətinə ayrılıb.
Məqalə müəllifi ilə əlaqə ünvanı - [email protected]
