...

Azərbaycan bankı Bank Respublika-da müştəri depozitlərinin həcmi 138,8 mln. manatı keçib

Biznes və iqtisadiyyat xəbərləri Materials 13 Fevral 2009 15:33

Trend-i buradan izləyin

Azərbaycan, Bakı, 13 fevral / Trend / Bank Respublika-da müştəri depozitlərinin həcmi 1 fevral 2009-cu il tarixinə 138,8 mln. manata çatıb. Bu barədə bankın cümə günü yayılan məlumatında bildirilir.

Depozit portfelinin 96,7 mln. manatı (69,7% hissəsi) müddətli depozitlərin payına düşüb.

Depozit portfelinin artımı əhali tərəfindən Bank Respublika-da yerləşdirilmiş əmanətlərin həcminin artımı ilə bağlıdır. Son iki ay ərzində Bank Respublika-da əhalinin əmanətləri 6 mln. manat və ya 9,7% artaraq 67,2 mln. manata çatıb.

Əhali əmanətlərinin artımı Bank Respublika-ya olan yüksək etibarın göstəricisidir. Bank Respublika-da əmanətlərin artımına həmçinin "Əmanət Şərtlərinin Sərbəst Seçimi" proqramı üzrə təklif edilən şərtlər və imkanlar da təsir edib. Bank Respublika-da manat və ABŞ dollarında əmanətlər üçün maksimal faiz dərəcəsi illik 16%-dir. Bank əmanətin məbləğinə heç bir məhdudiyyət qoymur.

Bank Respublika əmanətçiləri əmanətin məbləği və müddətindən asılı olaraq 45 günədək faizsiz kredit xətti ilə MasterCard və VISA kartlarını əldə edə, Home Banking və MobilBank xidmətinə pulsuz qoşula, bank seyfindən pulsuz istifadə edə, bankın hesabına səyahət və tibbi sığorta və güzəştli şərtlərlə kredit ala bilərlər.

Bank Respublika əmanətçiləri arasında daimi olaraq uduş kampaniyaları keçirir. Yaxın günlərdə bank əmanətçilər arasında yeni uduş kampaniyasını elan edəcək.

Bank Respublika "Əmanətlərin sığortalanması haqqında" qanuna əsasən yaradılmış Əmanətlərin Sığortalanması Fondunun üzvüdür və Bankda yerləşdirilmiş əhalinin əmanətləri Fondun şərtlərinə əsasən sığortalanır.

1992-ci ildən etibarən fəaliyyət göstərən Bank Respublika hazırda Azərbaycanın aparıcı banklarındandır. Bankın səhmdarları sırasında "25% + 1 səhm" paketinə malik Almaniyanın 2 böyük maliyyə təşkilatı təmsil olunur - KfW bank qrupunun üzvü DEG və Sparkassen-Finanzgruppe-nin üzvü SIDT.

Fevralın 13-nə olan rəsmi məzənnə 0,8062 AZN/USD təşkil edir. 

Xəbər lenti

Xəbər lenti