Azərbaycan, Bakı, 10 mart / Trend , müxbir N.İsmaylova /
Dünya bankının (DB) bəyanatında deyilir ki, DB-nin proqnozlarına əsasən qlobal iqtisadi böhran daha çox inkişaf etməkdə olan ölkələrə və Şərqi Asiya ölkələrinə mənfi təsir edəcək.
Sözügedən məruzə DB tərəfindən geniş formada isə martın 14-15-də Londonda baş tutacaq ölkələrin maliyyə nazirlərinin və Mərkəzi Bank rəhbərlərinin yığıncağında təqdim olunacaq.
DB-nin bəyanatında deyilir ki, böhranı adlamaq üçün kasıb ölkələrə 270-700 milyard dollar lazım olacaq. İqtisadi böhrana daha çox məruz qalan ölkələrin yalnız dörddə bir hissəsi böhranın fəsadlarını yüngülləşdirə biləcək və yoxsulluğun qarşısını sosial təminatlarla ala biləcəklər.
"İnkişaf etməkdə olan ölkələrdə siyasi və iqtisadi gərginliyin baş verməsinin qarşısını almaq üçün biz orada baş verən problemlərə dərhal reaksiya verməliyik", - DB-nin prezidenti Robert Zellik deyib.
Onun sözlərinə əsasən, kasıb ölkələrə iqtisadi cəhətdən inkişaf etmiş ölkələr, beynəlxalq təşkilatlar və özəl biznes sektoru yardım etməlidir. İlkin olaraq sosial sferaya, ifrastruktura, kiçik və orta müəssisələrə yatırımların edilməsi vacibdir.
DB ekspertlərinin fikrincə, dünya iqtisadiyyatı ikinci dünya müharibəsindən bəri ən dərin böhranla üz-üzədir. Ticarətdə müşahidə olunacaq enmə son 80 ildə ən güclü olacaq. Qlobal sənaye istehsalında cari ilin ortalarında ötən illə müqayisədə 15% geriləmə ola bilər.
Məqalə müəllifi ilə əlaqə ünvanı: [email protected]