Azərbaycan, Bakı, 16 mart / Trend , müxbir N.İsmayılova /
Azərbaycan Vergilər Nazirliyi və Azərbaycan-Türkiyə İş Adamları Birliyi nümayəndələrinin görüşü zamanı Vergi Siyasəti və Strateji Araşdırmalar İdarəsinin rəisi Şamil Ərəbov bildirib ki, Azərbaycan Vergilər Nazirliyi vergi dərəcələrinin optimallaşdırılması barədə təklifləri 1 yanvar 2010-cu il tarixindən qüvvəyə minməsi məqsədilə Azərbaycan parlamentinə təqdim edəcək.
"Hazırlanmış təklif əlavə dəyər vergisinin (ƏDV) bir, gəlir vergisinin isə iki faiz azalmasını nəzərdə tutur. Planlaşdırılmış təkliflər vergi dərəcələrinin qaldırılmasını nəzərdə tutmur", - Ərəbov deyib.
Hazırda Azərbaycanda qüvvədə olan gəlir vergisi dərəcəsi 22, ƏDV isə 18 faiz təşkil edir.
Kommersiya Hüquqi Şəxslərin və Təşkilatların Qeydiyyatı Dövlət İdarəsinin rəisi İftixar Axundovun sözlərinə əsasən, Vergilər Nazirliyi fiziki və hüquqi şəxslərlə, eləcə də əcnəbi kommersiya nümayəndəlikləri və filialları ilə bağlı məlumatları onlayn rejimində Dövlət Statistika Komitəsinə və Əhalinin Sosial Müdafiəsi Dövlət Fonduna göndərir ki, bu da vergi ödəyicilərini qeydiyyatla bağlı gələcək məsələlərdən azad edir.
Axundovun sözlərinə görə, 2008-ci ildə Azərbaycanda 6500-ə yaxın hüquqi şəxs qeydiyyatdan keçib və bu, 2007-ci il göstəricisindən 30 faiz çoxdur. Ötən il ümumilikdə 44200 sahibkarlıq subyekti, o cümlədən 40 faizi Türkiyə sahibkarları olmaqla, 510 xarici sərmayə ilə işləyən kommersiya hüquqi şəxslər qeydiyyatdan keçib.
Məqalə müəllifi ilə əlaqə ünvanı: [email protected]
