Azərbaycan, Bakı, 29 mart / Trend , müxbir Ü.İsmayılova/
Fevralda Bakının təkrar mənzil bazarında qiymətlər bir kvadrat metrə görə 4,4 faiz - 1,32 min dollaradək enib. Bu göstərici yanvarda 1,38 min dollara bərabər olub. Bu barədə bazar günü "Əmlak bazarı iştirakçıları" İctimai Birliyindən məlumat verilib.
Fevralda mənzillərin orta qiyməti 125,23 min dollar (yanvara nisbətdə +0,4 faiz), otaqların orta qiyməti 52,32 min dollar (+2,8 faiz), orta otaq göstəricisi 2,47 (+0,5 faiz) təşkil edib.
Orta qiymətdən aşağı bazara təqdim olunan mənzillərin payı 61,3 faiz təşkil edib.
Fevralda təkrar mənzil bazarında yeni tikililərin payı əhəmiyyətli dərəcədə artaraq 60 faiz (yanvara nisbətdə +4,4faiz) təşkil edib. Təkrar bazarda Leninqrad layihəli mənzillərin payı 12,6 faiz, təcrübi evlərin payı 7,4 faiz, "stalinka"ların payı 7,1 faiz, "xruşşovka"ların payı 3,2 faiz, Kiyev evlərinin payı 2,7 faiz, alman layihəli evlərin payı 1,3 faiz, fransız layihəli evlərin payı 1,4 faiz, Minsk layihəli evlərin payı 1,3 faiz, italyan evlərinin payı 0,4 faiz, xüsusi tikililərin payı isə 0,1 faiz təşkil edib.
Təkrar mənzil bazarı portfelinin böyük hissəsi (78,4 faizi) Yasamalda yerləşən evlərin payına (27,4 faiz) düşüb ki, bu da yanvara nisbətdə 1,3 faiz çoxdur. Bakının Nərimanov rayonunun payına 17,2 faiz, Nəsimi rayonunun payına 17,6 faiz və Xətai rayonunun payına 16,2 faiz düşüb.
Təkrar mənzil bazarında alqı-satqı sövdələşmələrinin imzalanma dinamikası 3,9 faiz düşüb. Bazara təkliflər 3 faiz artaraq 4,85 min obyektə çatıb. Əmlakın ekspozisiya müddəti dörd gün də artaraq 111 günə çatıb. Nəticədə obyektlərin gəlirlilik əmsalı 2,9 faiz, gəlirlilik müddəti isə 3 faiz düşüb.
Məqalə müəllifi ilə əlaqə ünvanı: [email protected]