Azərbaycan, Lənkəran, 01 aprel / Trend , müxbir P.Əliyeva/
Aprelin ortaları, mayın əvvəllərindən Lənkəranda (Azərbaycanın cənubunda yerləşir) alqı-satqı əməliyyatları üzrə fəallığın və müvafiq olaraq qiymətlərin artma ehtimalı gözlənilir. Bu barədə çərşənbə günü rieltor şirkəti Elnur MMC-nin direktoru Mirzə Əliyev bildirib.
"Bölgədə tərəvəz yığımı mövsümünün başlaması Rusiya ilə əlaqələrin genişlənməsinə, alıcıların, habelə yerli sakinlərin isə rayona axınına zəmin yaradacaq", - deyə Əliyev bildirib.
Onun sözlərinə görə, hazırda Lənkəranın mikrorayon ərazisində bir otaqlı mənzil 18-20 min, 2 otaqlı 27-28 min, 3 otaqlı mənzil isə 30-35 min dollardır. Ötən ilin müvafiq dövrü ilə müqayisədə qiymətlər 25-35 faiz aşağı düşüb. Şəhərin mərkəzi hissəsində isə əvvəllər 70-80 min dollara satışa qoyulan 2-3 otaqlı mənzillərin qiyməti indi 50-60 min dollar arasında dəyişir.
Lənkəranda torpağın da qiyməti düşüb. Bir sot torpağın qiyməti ötən ilin müvafiq dövründə yol kənarından, şəhər və kənd yerindən asılı olaraq 1- 25 min dollara idisə, indi qiymətlər 0,4-15 min dollar civarında dəyişir.
Məqalə müəllifi ilə əlaqə ünvanı: [email protected]