Azərbaycan, Bakı, 22 aprel / Trend /
İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti saxta sement satışı faktını aşkarlayıb.
Nazirliyin məlumatında deyilir ki, Dövlət Xidmətinin bu günlərdə keçirdiyi monitorinq zamanı Səbail rayonunda 20-ci sahə adlanan ərazidə yerləşən tikinti materiallarının satışı bazarında fiziki şəxs Cəbrayılov Dövlətalı Nəcəf oğluna məxsus topdansatış obyektində ümumi çəkisi 19,1 ton olan 382 kisə "Qaradağ-Sement" ASC-nin "Special M-400" əmtəə nişanı ilə nişanlanmış saxta sementin satıldığı aşkarlanıb.
Aşkar edilmiş saxta sement dövriyyədən çıxarılıb və keyfiyyətinin yoxlanılması üçün laborator müayinəyə təqdim olunub.
Saxta sementin digər ticarət obyektlərində də satılma ehtimalını nəzərə alaraq, bu cür halların qarşısının alınması üçün İstehlak Bazarına Nəzarət üzrə Dövlət Xidməti monitorinqləri davam etdirəcək.
