Azərbaycan, Bakı, 24 aprel / Trend /
"İş həcminin artırılması və lokomotiv parkının yenilənməsi məqsədi ilə təmirin vacibliyini nəzərə alaraq Azərbaycan Dövlət Dəmiryolu (ADD) bu sahədəki vəziyyəti dəyişəcək xüsusi proqram hazırlayıb", - rəsmi mətbuata müsahibəsində ADD başçısı Arif Əsgərov deyib.
Onun sözlərinə görə, bu proqram çərçivəsində, 5-10 il ərzində VL-8 tipli elektrovozların əvəzlənməsi və 10-15 yeni tip elektrovoz alınması, VL-11m tipli elektrovozların əsaslı təmirə göndərilməsi, 10-15 ədəd manevr və magsitral tipli teplovozların illik təmiri planlaşdırılır. Həmçinin, proqram Bakı lokomotiv deposunun elektrik maşın sexinin yenidənqurması və müasir avadanlığın alınmasını nəzərdə tutur.
Ötən il dövlət büdcəsindən ayrılan vəsaitlər hesabına VL-11 tipli iki və VL-8 tipli dörd elektrovoz alınıb və istismara verilib.
"Ötən il ADD-də 13,1 kilometr dəmiryolunun əsaslı təmiri, 50,4 kilometrin isə orta təmiri həyata keçirilib. Həmçinin ötən il ərzində istismara yararsız vəziyyətə düşmüş 24 min dəmiryol şpalı əvəzlənib", - Əsgərov deyib.
"Ötən il həmçinin, 766 yük vaqonu əsaslı, 3046 yük vaqonu isə depoda təmir olunub. 2008-ci ildə həmçinin, 70 sərnişin qatarı əsaslı, 322 sərnişin qatarı isə depoda təmirdən keçib", - Əsgərov bildirib.
