"Bu gün İranın Ənzəli şəhərində başlayan Xəzəryanı ölkələrin liman qurumlarının birinci iclasının yekunlarına əsasən müqavilə imzalanacaq", - çərşənbə axşamı İran Gəmiçilik İdarəsinin başçısı Əli Tahiri Mütləq deyib, İran televiziyası İRİB-in rəsmi xəbər saytı məlumat verib.
Mütləq deyib ki, toplantıda Xəzəryanı ölkələr yük daşımaları sahəsində əməkdaşlığı, yükləmə və boşaltma sistemlərinin sadələşdirilməsi, liman əməliyyatları xərclərinin azaldılması, nəqliyyat dəhlizindən daha intensiv istifadə olunması məqsədilə regiondakı yük daşımalarının artırılması, Xəzəryanı ölkələrdə liman infrastrukturunun tikintisinin özəl şirkətlərə verilməsi, həmçinin gəmiçilik sahəsində elmi əməkdaşlıq məsələləri müzakirə ediləcək.
Toplantıda gəmilər tərəfindən atılan tullantıların qarşısının alınması üzrə müqavilə imzalanacaq. Xəzəryanı ölkələrin liman başçıları həmçinin gəmilərin yoxlanılması və yanğın təhlükəsizliyi tədbirlərinin tətbiqi durumunu müzakirə edəcəklər.
Mütləq əlavə edib ki, Rusiya və İran gəmilərin su məkanını zibilləməsinin qarşısının alınması və axtarış-xilasetmə tədbirlərinin aparılması üzrə ikitərəfli müqavilələr imzalayacaq.
