Azərbaycan, Bakı, 13 may / Trend , müxbir Ü.İsmayılova /
Azərbaycanın iri sığorta şirkətlərindən olan "Az Sığorta" internet-sığortanın inkişafı üçün tədbirlər hazırlayır. Bu barədə çərşənbə günü şirkətin idarə heyətinin sədri Xəyal Məmmədxanlı deyib.
"Hazırda şirkət turistlərin sığorta edilməsi üçün "travel on-line" xidmətini tətbiq edib", - Məmmədxanlı bildirib.
Onun sözlərinə əsasən, gələcəkdə "Az Sığorta" təklif olunan bütün sığorta növlərinə görə "on-line" xidmətini tətbiq edəcək.
Məmmədxanlı öncə demişdi ki, turistlərin sığorta edilməsindən şirkət bir ay ərzində cəmi 5-10 min manat əldə edə biləcəyindən bu sığorta növü gəlirli deyil. Buna baxmayaraq, şirkət bu növ sığortadan imtina etmir.
Hazırda Azərbaycanda yalnız iki şirkət "on-line" sığorta təqdim edir - "Az Sığorta" və Beynəlxalq Sığorta Şirkəti.
"Az Sığorta" ölkənin sığorta bazarında 2006-cı ilin noyabrından fəaliyyət göstərir. Azərbaycanın müxtəlif regionlarında şirkətin 8 filialı və 40-a yaxın regional nümayəndəliyi var. "Az Sığorta"nın təqdim etdiyi 28 sığorta növündən 3-ü məcburidir.
Cari ilin birinci rübünün nəticələrinə əsasən, "Az Sığorta" 946 min manat ödənişə qarşı 3,443 milyon manat premiya toplayıb. Yığımın böyük hissəsi hava nəqliyyatı sığortası (829 min manat), yüklərin sığortası (640 min manat), yanğından sığorta (740 min manat), KASKO (319 min manat) və OSAQO-nun (168 min manat) payına düşüb.
Mayın 13-nə olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]
