Azərbaycan, Bakı, 20 may / Trend /
21-22 may tarixlərində Minskdə (Belarus) keçiriləcək MDB ölkələrinin Dəmir Yol Nəqliyyatı üzrə Şurasının toplantısında islahat və struktur dəyişiklikləri məsələləri üzrə MDB ölkələri, Latviya, Litva və Estoniyanın Dəmir Yol Nəqliyyatı üzrə Şura Komissiyasının nizamnaməsi təsdiq olunacaq, MDB İcraiyyə Komitəsinin verdiyi məlumatda bildirilib.
Toplantıda MDB ölkələrinin 2020-ci ilə qədər olan dövr ərzində nəqliyyat sahəsində əməkdaşlığının prioritet istiqamətlərinin həyata keçrilməsi proqramı, dəmir yol nəqliyyatı rəhbərlikləri arasında qarşılıqlı hesabatların hazırlanması, qatarların hərəkət qrafiki, konteynerlərin və vaqonların siyahıya alınması, lokomotiv briqadalarının qəza zamanı və fövqəladə hallarda fəaliyyəti məsələlərinin müzakirə edilməsi planlaşdırılır.
Azərbaycan toplantıda Dövlət Dəmir Yolunun rəhbəri Arif Əsgərovun başçılıq etdiyi nümayəndə heyəti tərəfindən təmsil olunacaq.
MDB ölkələrinin Dəmir Yol Nəqliyyatı üzrə Şurası və onun daimi fəaliyyət göstərən icra orqanı - Şuranın rəhbərliyi 1992-ci il 14 fevral tarixində imzalanmış müqavilə ilə dost ölkələr arasında sabit iqtisadi münasibətlərin qurulması məqsədilə, MDB üzv ölkələrinin hökumət başçıları tərəfindən təsdiq edilib.
Şuranın üzvləri MDB ölkələrinin dəmir yol rəhbərliyidir. Onun işində Latviyanın, Bolqarıstanın assosiativ üzv qismində, o cümlədən müqaviləyə uyğun olaraq Litva və Estoniyanın dəmir yol rəhbərliyi iştirak edir. Müşahidəçi qismində Beynəlxalq Dəmiryol və Nəqliyyat İnşaatçılarının Həmkarlar İttifaqlarının nümayəndəsi iştirak edir.
Şura dəmir yollarının istismar edilməsi, yük vaqonlarının və konteynerlərin birgə istifadəsi və saxlanması, yüklərin və sərnişinlərin daşınması şərtləri, qatarların beynəlxalq nəqliyyatda təhlükəsizliyinin təmin edilməsi, hesabat sistemlərinin hazırlanması, həyata keçirilmiş iş və xidmətlərin qarşılıqlı hesabatı, elmi-texniki əməkdaşlıq və digər məsələlərlə bağlı problemlərin həllinə nəzarət edir.
