Gürcüstan, Tbilisi, 22 may / Trend , müxbir N.Kirtsxaliya /
"Mən ümid edirəm ki, Batumi Azərbaycan turistləri üçün cəlbedici kurort olacaq", - Gürcüstan Prezidenti Mixail Saakaşvili azərbaycanlı qonaqlarla birlikdə birinci Bakı-Batumi aviareysi ilə Acarıstana səfəri zamanı deyib.
"Buna azərbaycanlı sərmayədarlarla birlikdə Batumidə həyata keçiriləcək layihələr yardımçı olacaq", - Saakaşvili deyib.
Onun sözlərinə görə, iki ölkə arasında artıq Batumidə gürcü-azəri şəhərciyinin tikintisi haqqında razılıq əldə olunub. Azərbaycanlı sərmayədarlar burada mehmanxana tikəcəklər.
"Batumi yalnız gürcülər üçün deyil, həm də bütün qonaqlar üçün sevimli şəhər olacaq. Bunun üçün hər şeyi edirik", - Saakaşvili bildirib.
İyunun 1-dən etibarən "Azərbaycan Hava Yolları" QSC (AZAL) Bakı-Tbilisi-Batumi-Tbilisi-Bakı aviareysinin kommersiya realizəsinə başlayır.
Reyslər həftədə iki dəfə - bazar ertəsi və cümə axşamları Bakı vaxtı ilə 08:30-da həyata keçiriləcək. Uçuşlar Fransa istehsalı olan ATR markalı təyyarələrlə həyata keçiriləcək.
Bir tərəfə biletin qiyməti 219 manat, hər iki sonluq üçün bilet 414 manat olacaq.
Məqalə müəllifi ilə əlaqə ünvanı: [email protected]