Azərbaycanda sığorta bazarının iştirakçıları üçün "call-center" yaradılacaq
Azərbaycan, Bakı, 06 iyun / Trend , müxbir Ü.İsmayılova /
Azərbaycan Sığortaçılar Assosiasiyası (ASA) Rabitə və İnformasiya Texnologiyaları Nazirliyinə, sığorta edən və sığorta olunanlardan şikayət və təkliflərin qəbulu üçün üçrəqəmli nömrənin əldə edilməsi məqsədi ilə müraciət edib, cümə günü ASA-nın icraçı direktoru Qafar Məcidov bildirib.
"Call-center"-də toplanmış bütün informasiya müəyyən dövrdə Dövlət Sığorta Nəzarəti Xidmətinin dəstəyi ilə müvafiq qərarın qəbul edilməsi üçün analiz ediləcək, belə ki, bu fəaliyyət hazırda sığorta nəzarəti tərəfindən həyata keçirilir", - Məcidov deyib.
Onun sözlərinə görə, assosiasiya Dövlət Sığorta Nəzarəti Xidməti ilə birlikdə bazarda qanun pozuntularının aşkar edilməsi və aradan qaldırılması üzrə iş görmək niyyətindədir.
Azərbaycan Dövlət Sığorta Nəzarəti Xidməti sığorta ödənişlərindən boyunqaçırma faktlarının aşkar edilməsi üçün bazarda müntəzəm olaraq monitorinqlər keçirir. Ödənişin edilməməsi əsassız olduğu halda, dövlət xidməti sığortaçıdan ödənişin verilməsini tələb edir.
"Call-center" sığorta edənlər və sığorta olunanlar üçün bir növ müdafiə forması olacaq", - Məcidov deyib.
Azərbaycan Sığortaçılar Assosiasiyası 2006-cı ilin dekabrında təsis edilib. Assosiasiyanın tərkibinə bütün fəaliyyət göstərən sığortaçılar daxildir. Təşkilatın nəzarət şurasına Azərbaycanın 5 şığorta şirkəti - MBASK, Standard Insurance, Azerisigorta, Ateshgah və Beynəlxalq Sığorta Şirkəti daxildir.
Məqalə müəllifi ilə əlaqə ünvanı: [email protected]
