Azərbaycan, Bakı, 22 iyun / Trend , müxbir C.Babayeva /
Azərbaycan və Pakistan arasındakı ticari-iqtisadi əməkdaşlığın inkişafı məsələləri payızda iqtisadi əməkdaşlıq üzrə hökumətlərarası komissiyanın beşinci iclası çərçivəsində Bakı şəhərində müzakirə olunacaq. Bu barədə bazar ertəsi Trend -a Azərbaycanın İslamabaddakı səfirliyinin ikinci katibi Sabir Rzayev bildirib.
İclasda ikitərəfli əməkdaşlıq üzrə məsələlərin geniş spektrinin müzakirə olunması planlaşdırılır. Bu, komissiyanın Pakistanın yeni hökumətinin formalaşmasından sonra keçirilən ilk iclası olacaq. Əsas diqqət iki ölkə arasında yanvar-aprel aylarında 4,7 milyon dollar təşkil edən əmtəə mübadiləsi məsələsinə ayrılacaq.
Hazırda iqtisadi əlaqələrin səviyyəsi siyasi və humanitar sahələrdəki tərəfdaşlıqdan geri qalır ki, bu da bir neçə səbəblə, həmçinin birbaşa avia əlaqənin olmaması ilə əlaqədardır. Hökumətlərarası komissiya birbaşa reyslərin açılması perspektivlərini öyrənəcək.
