Azərbaycan, Bakı, 29 iyun / Trend , müxbir N.İsmayılova /
"Azərbaycan bankı Əmrahbank-ın xarici səhmdarı - Bəhreyndə yerləşən Beynəlxalq Sərmayə Bankı ona maliyyə dəstəyi göstərməyə hazırdır", - bazar ertəsi bankın idarə heyətinin üzvü Fazil Hüseynov bildirib.
"Vəsaitlər kredit xətti formasında təqdim olunacaq, ancaq onun həcmi və açılma tarixi hələ dəqiqləşdirilməyib", - Hüseynov bildirib.
Onun sözlərinə görə, kredit xəttinin bu il ərzində alınması gözlənilir.
Beynəlxalq Sərmayə Bankı tərəfindən Əmrahbank-ın səhmlərinin 49 faizinin alınması strateji tərəfdaşlıq, bankın həyat və fəaliyyətində yer alan bir sıra sahələrdə - korporativ idarəetmə, beynəlxalq əməkdaşlıq, məhsul və xidmətlərin xətti və keyfiyyəti - müsbət dəyişiklilərin baş verməsində vacib rol oynayıb. Səhmlərin qalan paketi (51 faiz) ölkənin fiziki şəxs-rezidentləri arasında bölünüb.
2009-cu ilin aprelin 1-nə Əmrahbank-ın aktivləri 61,442 milyon manat, depozit portfeli - 31,142 milyon manat, kredit portfeli - 39,552 milyon manat, müştərək kapital - 22,552 milyon manat, həmçinin nizamnamə kapitalı 12,821 milyon manat təşkil edib.
Hazırda respublikada bankın 22 filialı, 12 bankomatı və 45 POS-terminalı fəaliyyət göstərir.
Əmrahbank 1993-cü ildə yaradılıb.
İyunun 29-na olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]