Azərbaycan, Bakı, 03 avqust / Trend , müxbir E.İsmayılov /
"Donuz qripi"nə yoluxmuş Azərbaycan vətəndaşları ilə ünsiyyətdə olmuş şəxslər nəzarət altında olacaq, çünki onlar yoluxma riski qrupundadırlar. Bu barədə bazar ertəsi Azərbaycan Səhiyyə nazirliyinin mətbuat xidmətinin rəhbəri Anar Qədirli deyib.
"Bu gün ikinci xəstə - 15 yaşlı yeniyetmə xəstəxanadan evə buraxılıb. Evə buraxılan xəstələr, həmçinin onlarla ünsiyyətdə olan şəxslər də nəzarətdə olacaqlar, çünki onlar da risk qrupuna daxildirlər", - Qədirli bildirib.
"Hər iki xəstə evə buraxılıb və heç bir təhlükə törətmirlər, - Qədirli deyib. - Xəstələrdə immunitet yaranıb və onlar bu xəstəliyə ikinci dəfə yoluxa bilməzlər".
Bu gün tibb məntəqəsindən evə buraxılan yeniyetmə Bakıya iyulun 29-da Böyük Britaniyadan gəlmişdi.
Şənbə günü həmçinin "donuz qripi"nə yoluxmuş 43 yaşlı qadının da xəstəxananı tərk etməsinə icazə verilib. O, iyulun 27-də Bakıya Parisdən gəlib, iyulun 29-da isə müvafiq simptomlarla tibb müəssisəsinə müraciət edib. Virusun varlığı analizi müsbət nəticə verib.
İyulun 29-da Bakı Hava Limanında qurulmuş "termosensor" qurğusu vasitəsilə Azərbaycana Böyük Britaniyadan gələn vətəndaşda yüksək temperatur qeydə alınmışdı.
Cümə axşamı Səhiyyə Nazirliyi Azərbaycanda "donuz qripi"nə yoluxan iki nəfərin aşkarlanması barədə bəyanat vermişdi.
Məqalə müəllifi ilə əlaqə ünvanı: [email protected]
