Azərbaycan, Bakı, 06 avqust / Trend , müxbir E. İsmayılov /
"Azərbaycan Hava Yolları" QSC-nin həyata keçirdiyi Bakı - Tel-Əviv - Bakı reysinin müddətinin uzadılması barədə yekun qərar hələ qəbul olunmayıb. Bunu cümə axşamı QSC-nin mətbuat xidmətinin rəhbəri Məhərrəm Səfərli deyib.
"Danışıqlar davam etdirilir, lakin uzadılma barədə qərar hələ qəbul olunmayıb", - Səfərli deyib. Danışıqlar "AZAL" QSC və İsrailin "Arkia" aviaşirkəti arasında aparılır.
İlkin qərara əsaən, AZAL tərəfindən reyslər avqustun 20-dək həyata keçiriləcək. Hələlik biletlər yalnız bu vaxta qədər verilir, cümə axşamı AZAL-dan deyilib.
Keçən il İsrailin "Arkia" aviaşirkəti Tel-Əviv - Bakı reysinin reallaşdırılması üçün lisenziya alıb. Lakin uçuşun həyata keçirilməsi üçün İsrail aviaşirkəti təhlükəsizlik məsələsi qaldırıb. İsrail KİV-nin məlumat verdiyi kimi, aviaşirkət Azərbaycan tərəfinin gördüyü təhlükəsizlik tədbirlərini qeyri-qənaətbəxş hesab edir. Bu da "Arkia" təyyarələrinin Bakıya enməsinə imkan vermir. Öz növbəsində Azərbaycan nümayəndələri bununla razı deyil.
16 il müddətində bu istiqamətdə yalnız "AZAL" QSC-nin təyyarələri uçur. Bakı - Tel-Əviv - Bakı marşrutu üzrə uçuşlar həftədə iki dəfə - çərşənbə və bazar günləri həyata keçirilir. Təyyarələr Bakıdan saat 09:35-də havaya qalxır və həmin gün Bakı vaxtı ilə saat 17:50-də yerə enir.
Məqalə müəllifi ilə əlaqə ünvanı: [email protected]