Gürcüstan, Tbilisi, 25 avqust / Trend , müxbir N.Kisrxaliya /
Azərbaycan yeddi ay ərzində 296,1 milyon dollarlıq göstərici ilə Gürcüstanın xarici ticarət dövriyyəsində ikinci yeri qoruyur. Bu barədə Statistika Departamenti məlumat verib.
"Bu, ötən ilin analoji dövrünə olan göstəricidən 39,9 faiz azdır", - departamentdən deyilib.
Gürcüstanın iri ticarət tərəfdaşı Türkiyədir. Bu ölkə ilə xarici ticarət dövriyyəsi 16,7 faiz azalaraq 589,8 milyon dollar təşkil edib.
Departamentdən qeyd edilib ki, Gürcüstanın xarici ticarət dövriyyəsinin göstəriciləri azalmaqda davam edir. 2009-cu ilin yanvar-iyulunda Gürcüstanın xarici ticarət dövriyyəsi 2 996 milyon dollar təşkil edib. Bu da ötən ilin müvafiq dövründəki göstəricidən 37,4 faiz azdır. Üçüncü yeri Ukrayna tutur. Bu ölkə ilə xarici ticarət dövriyyəsi 40,7 faiz azalıb (272,7 milyon dollar).
Yanvar-iyul ərzində ixrac əməliyyatları 35,5 faiz (617,3 milyon dollar), idxal əməliyyatları isə 37,8 faiz (2 378,7 milyon dollar) azalıb.
Bu ilin yanvar-iyulunda mənfi ticarət balansı 1 761,4 milyon dollar təşkil edib. Bu da keçən ilin analoji dövründəkindən 38,6 faiz aşağı göstəricidir. Mənfi ticarət balansı 98 tərəfdaş ölkə ilə ticarət münasibətlərində qeydə alınıb. Müsbət ticarət balansı 94,3 milyon dollar təşkil edib və 22 ölkə ilə münasibətlərdə qeydə alınıb.
Gürcüstanın Avropa İttifaqı ölkələri ilə xarici ticarət dövriyyəsi 36,6 faiz (833,6 milyon dollar) azalıb. O cümlədən ixrac 42,9 faiz (127 milyon dollar), idxal 35,4 faiz (706,7 milyon dollar) əskilib.
MDB ölkələri ilə xarici ticarət dövriyyəsi 42 faiz (898,4 milyon dollar) azalıb. O cümlədən ixrac 222,2 milyon dollar (28 faiz), idxal 676,2 milyon dollar (45,5 faiz) təşkil edib.
Məqalə müəllifi ilə əlaqə ünvanı: [email protected]
