Azərbaycan, Bakı, 28 avqust / Trend , müxbir İ.Xəlilova /
Fransanın BNP Paribas bankı ilə danışıqların sentyabrda başlayacağı gözlənilir. Danışıqlar Azərbaycanda avtomobil yollarının (avtomagistralın üçüncü hissəsi - (M3) Muğanlıdan Yevlaxadək, Yevlax-Zaqatala-Gürcüstan sərhədi (M4)) inşası layihəsi üçün maliyyələşmə şərtlərinin dəyişikliyi ilə əlaqədar olacaq. Bu barədə cümə günü ölkə hökumətindən deyiblər.
[Fransa bankları dünya böhranına cavab olaraq kredit tələblərini və şərtlərini sərtləşdiriblər.]
"Kredit şərtlərinə yenidən baxılması ilə yanaşı, BNP Paribas Azərbaycan hökumətinə maliyyələşmənin həcmini əvvəl müəyyənləşdirilmiş 320 milyon dollardan 270 milyon dollaradək azaltmağı da təklif edib", - hökumətdəki mənbədən deyilib.
Bank ilkin olaraq 400 milyon dollar təklif etmişdi. Bundan 80 milyon dollar kommersiya şərtləri əsasında olub. Kreditin kommersiya hissəsindən Azərbaycan hökuməti imtina edib.
Yol layihələrinin realizəsinə 320 milyon dollar ayrılması barədə kredit müqaviləsi BNP Paribas və Azərbaycan Nəqliyyat Nazirliyi arasında 13 iyun 2008-ci ildə Bakıda imzalanıb. Fransa bankı maliyyələşməni İsrailin ASHRA sığorta şirkətinin sığorta dəstəyi ilə verib. Müqavilənin şərtlərinə əsasən, kredit 4 illik güzəşt dövrü ilə, illik libor+0,45 faiz dərəcəsi ilə 14 il müddətinə verilib. Tikinti işlərinin dörd il ərzində başa çatdırılması planlaşdırılır.
Muğanlıdan Yevlaxadək ümumi uzunluğu 156 km olan avtomobil yolunun ümumi dəyəri 250 milyon dollardır. İkinci yol layihəsi (uzunluğu 164 km olan Yevlax-Zaqatala-Gürcüstan sərhədi) üzrə ümumi dəyər isə dəqiqləşdirilir. Azərbaycanda layihələrin bahalaşmasına 2008-ci ildən idxal mallarına, beynəlxalq kreditlər hesabına həyata keçirilən xidmət və işlərə əlavə dəyər vergisinin tətbiqi təsir göstərib.
Bu, BNP Paribas-la yol layihəsi üzrə birinci kredit müqaviləsidir.
Məqalə müəllifi ilə əlaqə ünvanı: [email protected]
