Gürcüstan, Tbilisi, 02 sentyabr / Trend , müxbir N.Kirsxaliya /
Türkiyə biznesmenləri Gürcüstan iqtisadiyyatına yeni investisiya yatırmağa hazırdırlar. Çərşənbə günü Gürcüstan Kənd Təsəruffatı Nazirliyindən deyilib ki, bu dəfə onların maraq dairəsi zeytun istehsalı olub.
Gürcüstanın kənd təsərrüfatı naziri Bakura Kvezereli ilə Türkiyə biznesmenlərinin görüşündə kənd təsərrüfatının bu sahəsinin inkişafı perspektivləri müzakirə edilib. Görüşdən sonra nazir özü şəxsən onlara Kaxetidə zeytun becərilməsi üçün yararlı olan torpaqları göstərib. Həmin ərazilər uzun illər ərzində istifadə edilməyən zeytun plantasiyalarına aid olub.
"Düşünürük ki, Gürcüstanda bu biznes böyük potensiala malikdir və biz artıq üç təcrübə təsərrüfatının yaradılması üçün Kənd Təsərrüfatı Nazirliyi ilə razılıq əldə etmişik. Bu bizə Gürcüstan aqroiqliminə uyğun olan zeytun sortları yetişdirməyə imkan verir. Bundan sonra biznesin miqyasının genişləndirilməsinin mümkünlüyündən danışmaq olar", - OZG Türk şirkətinin prezidenti Əli Sami Özən deyib.
Türkiyəli nümayəndələr həm də öyrənilməsi üçün torpaqdan nümunələr götürüblər. "Dünyada zeytuna və zeytun yağına olan tələbat artıb. Türkiyə biznesmenləri Gürcüstanda dövlətin dəstəyi ilə bu istehsalatı dirçəltməyə hazırdır", - Kvezereli deyib.
Onun sözlərinə görə, Türkiyə biznesmenləri təkcə zeytun istehsalını təşkil etməyə deyil, həm də Gürcüstan iqtisadiyyatına müsbət təsir edəcək işlək müəssisələr qurmağa hazırlaşırlar.
Gələcəkdə Kaxetidən başqa, Msxeta-Mtianeti və Kvemo Kartlidə də zeytun plantasiyaları salınacaq.
Məqalə müəllifi ilə əlaqə ünvanı: [email protected]
