Azərbaycan, Bakı, 09 sentyabr / Trend , müxbir N.İsmayılova /
Azərbaycan Vergilər Nazirliyinin (VN) operativ nəzarət tədbirlərinin yekunlarına görə, iyul-avqustda 9398 vergi qanunvericiliyinin pozulması halı aşkarlanıb. Bu barədə çərşənbə günü VN-dən verilən məlumatda deyilir.
Bu müddətdə 2601 vergi ödəyicisi nağd hesablaşmaların aparılması qaydalarını pozub, 134 vergi ödəyicisində ödəniş vasitəsi kimi xarici valyutanın qəbulu aşkar edilib. Aparılmış tədbirlər nəticəsində vergi orqanlarına uçota durmadan fəaliyyət göstərən 554 vergi ödəyicisi aşkar edilib, 690 vergi ödəyicisinin isə xüsusi razılıq (lisenziya) tələb edən fəaliyyət növlərində lisenziya olmadan fəaliyyət göstərdiyi müəyyənləşdirilib.
Operativ nəzarət tədbirləri zamanı 88 vergi ödəyicisində 88 nəfər fiziki şəxsin əmək müqaviləsi bağlamadan işə cəlb edilməsi, 399 vergi ödəyicisinin fərqlənmə nişanı olmadan avtomobil nəqliyyatı ilə sərnişin daşıması, 163 şəxs tərəfindən valyuta sərvətlərinin ictimai yerlərdə alınıb-satılması faktları aşkar olunub.
Aksiz markalarının tətbiqi vəziyyətinə nəzarət məqsədilə keçirilən tədbirlər zamanı isə 35 vergi ödəyicisində 4 564,4 manat dəyərində 3121 ədəd aksiz markaları ilə müvafiq qaydada markalanmamış mallar aşkar edilib.
Sentyabrın 09-na olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]
