Azərbaycan, Bakı, 14 sentyabr / Trend , müxbir Ü.İsmayılov /
Azərbaycanın Standartlaşdırma, Metrologiya və Patent üzrə Dövlət Komitəsi ölkədəki "Bureau Veritas Azeri" MMC sertifikasiya təşkilatının fəaliyyət icazəsinin geri alınması qərarına sertifikatlaşdırma tələblərinin pozulması hallarının aradan qaldırılmasından sonra yenidən baxmağa hazırdır, bu barədə şirkətin bazar ertəsi yayılan məlumatında deyilir.
Dövlət Komitəsi təşkilatın fəaliyyətinə verilən icazəni aparılan yoxlamaların nəticəsinə əsasən geri alıb.
Aparılan yoxlamalar zamanı Bureau Veritas Azeri şirkətində ISO 9001:2000 tələblərinin ciddi şəkildə pozulması halları və milli və beynəlxalq sertifikasiya sistemi tələblərinə cavab verən əsas sənədlərin olmaması müəyyən edilib. Bu sənədlər təşkilatların ISO/MEK 17021standartları üzrə keyfiyyətin idarə edilməsi sisteminin qiymətləndirilməsinin aparılması zamanı sertifikasiya orqanının fəaliyyəti üçün vacibdir.
Bureau Veritas Azeri Dövlət Komitəsinə öz fəaliyyətinin razılaşdırılması məqsədilə sözügedən qərara yenidən baxılması üçün müraciət edib. MMC-ə aşkarlanan pozuntu hallarının aradan qaldırılması üçün üç ay vaxt verilib.
Məqalə müəllifi ilə əlaqə ünvanı: [email protected]
