Azərbaycan, Bakı, 29 oktyabr / Trend , müxbir İ.Xəlilova/
Beynəlxalq Maliyyə Korporasiyası (BMK) Azərbaycan Mərkəzi Bankı yanında fəaliyyət göstərən Azərbaycan İpoteka Fondunun (AİF) məhsullarının və standartlarının təkmilləşdirilməsinə dəstək göstərməyə hazırdır. Bu barədə BMK-nın Mərkəzi Asiyada və Azərbaycanda ilkin ipoteka kreditləşməsi bazarının inkişafı üzrə layihəsinin rəhbəri Viktor Mins Trend -a deyib.
"AİF ilə çərçivə memorandumunda fondun idarə edilməsi üzrə bank işçilərinin təlimatlandırılması üçün yeni standartların və məhsulların işlənib hazırlanması istiqamətində birgə iş nəzərdə tutulur", - Mins deyib.
Memorandumun bəndlərindən birində deyildiyi kimi, ipoteka fondunun özəlləşdirilməsi üçün dünyadakı proseslərlə əlaqədar münasib zaman deyil və hər şey dünya böhranının nə dərəcədə tez sona çatmasından asılı olacaq.
"Böhran ipoteka ilə əhəmiyyətli dərəcədə əlaqəlidir, buna görə də hər şeyin hansı sürətlə daha sərfəli şəkil alması onun nə zaman bitməsindən asılı olaraq məlum olacaq, - BMK-nın layihə rəhbəri deyib. - Bu hesabla dünyanın aparıcı ölkələri ipotekaya dövlət dəstəyini artırır, hətta ABŞ-da analoji sturukturların deprivatizasiyası getdiyi halda AİF-in özəlləşdirilməsi qəribə olardı".
Onun sözlərinə görə, hazırda dünya bazarında ziddiyyət təşkil edən tendensiya baş verir və böhranın sonunda bu tendensiya dəyişməlidir, lakin bunun nə zaman baş verəcəyi məlum deyil. Hər halda bu gün AİF-in özəlləşdirilməsi gündəmdə deyil, lakin bu o demək deyil ki, maliyyələşdirilmə məsələsi müzakirə olunmayacaq.
"Bununla yanaşı, fondun qlobal özəlləşdirilməsinə, bankın ipoteka portfelinin təhlükədən qorunmasına hazırlaşmaq lazımdır", - Mins deyib.
Bu həftə Fitch Ratings Beynəlxalq Reytinq Agentliyi Azərbaycan İpoteka Fonduna yerli və xarici valyutada uzunmüddətli öhdəliklər üzrə stabil proqnozlu "BB" kredit reytinqi verib. Beynəlxalq reytinqin alınması Azərbaycan İpoteka Fonduna gələcəkdə daxili bazarla yanaşı, xarici bazarlardan da sərbəst vəsaitlərin cəlbinə imkan verəcək.
Azərbaycan İpoteka Fondu 2005-ci ilin senyabrında dövlət sektoru kimi yaradılıb və 2006-cı il martın 25-dən kreditin verilməsinə başlayıb. Hazırda ölkədə AİF xətti ilə 132 milyon manat ipoteka krediti verilib. 2005-2009-cu illər üçün fondun dövlət büdcəsindən aldığı məcmu vəsaiti 72,4 milyon manata çatıb.
Oktyabrın 29-na olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]
