Azərbaycan, Bakı,12 mart / Trend , müxbir E.İsmayılova/
Avtomobil istehsalı üzrə Azərbaycan-Koreya birgə müəssisəsinin yaradılması yerli və regional bazarların araşdırılmasından sonra mümkün olacaq. Bunu Bakıda səfərdə olan Cənubi Koreyanın torpaq, nəqliyyat və su məsələləri üzrə naziri Çon Çjon Xvan deyib.
"Burada istehsalat müəssisəsinin yaradılması üçün, ilk növbədə, araşdırma aparılmalı, bazar öyrənilməlidir", - Xvan Çunq bildirib.
Onun sözlərinə görə, belə istehsalatın yaradılması hazır məhsulun təkcə Azərbaycan bazarı ilə kifayətlənməyərək, qonşu ölkələrə satışını nəzərdə tuta bilər.
"Əgər Azərbaycan və qonşu ölkələrin bazarlarının araşdırılması müsbət nəticə verərsə, belə müəssisənin yaradılması mümkün ola bilər", - nazir qeyd edib.
Azərbaycanda avtomobil istehsalı Şamaxı Avtomobil Zavodunda həyata keçirilir. Zavodda İranın "Samand " şirkəti ilə birlikdə bu markadan olan avtomobil yığılır.
Həmçinin, Naxçıvan Avtomobil Zavodu da öz fəaliyyətini canlandırıb. Zavodun gücü ildə 4-5 min avtomobildir. Zavodda "Lifan" markalı avtomobillər (Çin istehsalı) yığılır. Hazırda zavodun qarşısına qoyulan vəzifə NMR-in avtomobilə olan tələbatının təmin olunmasıdır. Perspektivdə bu müəssisənin istehsal etdiyi avtomobillərin Türkiyə və İran bazarına çıxarılması planlaşdırılır.