Azərbaycan, Bakı, 31 mart / Trend , müxbir Ü.İsmayılova/
"Bakı Sığorta" şirkətinin 2009-cu ildəki fəaliyyətinin yekunları üzrə aktivləri 9,91milyon manat təşkil edib və il ərzində 4,81 faiz artıb. Bu barədə müstəqil auditorun rəsmi mətbuatda dərc olunmuş rəyində bildirilir.
Həmin dövrdə şirkətin uzunmüddətli aktivləri 2,72 milyon manat, uzunmüddətli aktivlər 7,18 milyon təşkil edib. Şirkətin depozit hesablarında qısamüddətli aktivlərin strukturunda 4,95 milyon manat cəmləşib və valyuta hesabları 2,45 min manat təşkil edib.
"Bakı Siğorta" ASC-nin ödənilmiş nizamnamə kapitalı ötən il 2 milyon manat təşkil edib. İlin əvvəlində bu göstərici 1,5 milyon manat olub. Ötən ilin yekunları üzrə şirkətin mənfəəti (2,37 milyon manat səviyyəsində) və əvvəlki illərin paylanmamış mənfəətinin (2,37 min manat) nəzərə alınmaqla şirkətin məcmu kapitalı ilin yekunları üzrə 4,37 milyon manat təşkil edib. İlin əvvəlində bu göstərici 2,19 milyon manat təşkil edib.
Şirkətin uzunmüddətli öhdəlikləri 5,53 milyon manat, qısamüddətli öhdəlikləri 228 milyon manat, ümumilikdə kapitalı və öhdəlikləri 9,91 milyon manat təşkil edib.
Ötən ilin yekunları üzrə şirkətin gəlirləri 6,8 milyon manat, o cümlədən sığorta haqlarından daxilolmalar - 3,4 milyon manat, təkrar sığorta haqları - 180,74 min manat, sığorta ödənişlərində təkrar sığortaçıların payı - 378, 28 min manat, təkrar sığorta müqavilələri üzrə komisyon haqları - 63,02 min manat təşkil edib. Şirkətin investisiya gəlirləri 974,51 min manat səviyyəsində olub.
2009-cu ilin yekunları üzrə şirkətin xərcləri 4,4 milyon manat, o cümlədən sığorta ödənişləri və sığorta məbləğləri ilə bağlı əməliyyat xərcləri - 1,62 milyon manat, sığorta haqlarının qaytarılması ilə bağlı - 430,98 min manat, sığorta haqlarının təkrar sığortaya verilməsi üzrə - 841,57 min manat, inzibati xərclər - 1,2 milyon manat təşkil edib.
2009-cu ildə "Bakı Sığorta" ASC 468,03 min manat məbləğində mənfəət vergisi, 109,32 min manat həcmində gəlir vergisi ödəyib. Sosial sığorta və təminat üzrə ödənişlər 135,19 min manat təşkil edib.
"Bakı Sıgorta" Azərbaycanın sığorta bazarında 2007-ci il avqustun 28-dən fəaliyyət göstərir. Şirkətin nəzarət səhm paketi "Bank Republika" ASC-yə məxsusdur. "Bakı Sığorta" ASC "Tural Siğorta" şirkətinin nəzarət səhm paketinin (səhmlərin 50 faizdən çoxu) bank tərəfindən alınması yolu ilə yaradılıb. Yenilənmiş şirkətin səhmlərinin qalığı fiziki şəxslər arasında bölünüb.
