Azərbaycan, Bakı, 5 aprel /Trend/
Azərbaycan Respublikası Nazirlər Kabineti ölkədə totalizatorların (cıdır-şans oyunları) təşkilini təkmilləşdirmək məqsədi ilə totalizatorların təşkil edilməsi və keçirilməsi, dövriyyəsindən əldə olunan vəsaitin və uduş fondunun bölünməsi qaydalarına əlavələr edib. Bu barədə Nazirlər Kabinetinin sərəncamında deyilir.
Dəyişiliklərə əsasən, Azərbaycan Respublikası Qiymətli Kağızlar üzrə Dövlət Komitəsinin səlahiyyətli əməkdaşlarının cıdır-şans (totalizator) oyunları ilə məşğul olan subyektlərin obyektlərinə daxil olmaq, onlardan müvafiq məlumatlar almaq hüquqları var.
Cıdır-şans (totalizator) oyunları ilə məşğul olan subyektlər tərəfindən yol verilmiş pozuntuların aradan qaldırılması üçün onlara qanunvericiliklə müəyyən edilmiş qaydada icrası məcburi olan göstərişlər yazılı formada verilməlidir. Göstərişlər əmr və sərəncam formasında rəsmiləşdirilməlidir. İcrası məcburi olan göstərişlər yerinə yetirilmədikdə, müvafiq cıdır-şans (totalizator) oyunları ilə məşğul olan subyektlərin fəaliyyətini dayandırmaq barədə məhkəməyə müraciət olunmalıdır, onlar qanunvericiliklə müəyyən edilmiş qaydada məsuliyyətə cəlb edilməlidir.
Bu qərar imzalandığı gündən - martın 17-dən qüvvəyə minir.
