Azərbaycan, Bakı, 6 aprel /Trend, müxbir Ü.İsmayılova/
"Era Trans Sığorta" ASC şirkəti göstərilən xidmətlərin siyahısını genişləndirmək niyyətindədir. Bu barədə çərşənbə axşamı şirkətdən məlumat verilib.
"Şirkət yeni fəaliyyət növü - tibbi sığorta üçün lisenziya almaq məqsədilə Maliyyə Nazirliyinin Dövlət Sığorta Nəzarəti Xidmətinə müraciət edib", - şirkətdəki mənbə bildirib.
Onun sözlərinə görə, şirkət rəhbərliyi bazarda tələbat böyük olduğundan tibbi sığorta üzrə xidmətlərin göstərilməsi barədə qərar qəbul edib.
1994-cü ildən fəaliyyət göstərən "Era Trans Sığorta" sığortanın 22 könüllü və 4 icbari növü üzrə xidmət göstərir. Yanvar-fevral aylarında fəaliyyətinin yekunları üzrə şirkətin tədiyələri 0,15 milyon manat, ödənişləri isə 0,07 milyon manat təşkil edib.
Yanvar-fevral aylarının yekunları üzrə Azərbaycanın sığorta şirkətlərinin tədiyələri 6,89 milyon manat (ümumi sığorta tədiyəsi həcminin 23,24 faizi), ödənişləri isə 2,52 milyon manat (ümumi ödənişlərdə 38,89 faiz) təşkil edib.
Aprelin 6-na olan rəsmi məzənnə 0,8034 AZN/USD təşkil edir.
