Azərbaycan, Bakı, 12 aprel /Trend, müxbir E.İsmayılov/
Koreyanın "Dong Sang Engineering" şirkəti Bakı buxtası rayonundakı yeni körpünün texniki-iqtisadi əsaslandırmasını (TİƏ) hazırlayacaq. Bunu Azərbaycan Nəqliyyat Nazirliyinin Nəqliyyat siyasəti və iqtisadiyyat şöbəsinin müdiri Sədrəddin Məmmədov deyib.
Məmmədovun sözlərinə görə, daha əvvəl "Dong Sang Engineering" şirkəti elan edilmiş tenderin qalibi olub.
"Layihənin TİƏ-sini Koreyanın "Dong Sang Engineering" şirkəti hazırlayacaq. Şirkətin nümayəndələri yerdə zəruri araşdırmalar aparmaq üçün ay ərzində Azərbaycana gəlməlidirlər", - Məmmədov deyib.
Daha əvvəl Azərbaycanın Nəqliyyat Nazirliyi və Koreyanın Azərbaycandakı səfirliyi körpünün tikintisinin TİƏ layihəsi çərçivəsində qrant müqaviləsi imzalayıblar. 1,5 milyon dollar həcmində qrant Koreya Beynəlxalq Əməkdaşlıq Agentliyi tərəfindən ayrılıb.
TİƏ layihəsi və onun təqdim edilməsi növbəti iki il ərzində Koreya tərəfindən hazırlanacaq.
Həmin körpü Bakı buxtasının iki sonluğunu birləşdirəcək. Körpünün dəniz hissəsi 14 kilometr təşkil edəcək. Bu körpünün tikintisi üzrə işlərin 5 il ərzində başa çatdırılması planlaşdırılır.
