Azərbaycan, Bakı, 21 aprel /Trend, müxbir Ü.İsmayılova/
Martda Bakının torpaq bazarında qiymətlər orta hesabla 0,6 faiz azalaraq, bir sota görə 14 436 dollar təşkil edib. Fevralda bu göstərici 14 521 dollar təşkil edib. Bu barədə çərşənbə günü "Əmlak Bazarı İştirakçıları" İctimai Birliyindən məlumat verilib. Martda şəhərin bütün zonalarında qiymətlərin azalması müşahidə olunub.
Martda torpaq bazarında ən bahalı torpaq sahəsi Nəsimi rayonunda (bir sot torpaq üçün 190 min dollar), ən ucuz isə Abşeron rayonunda (bir sot torpağa 350 dollar) müşahidə olunub.
Martda Bakı bazarında 806,5 hektar torpaq təklif edilib ki, bunun da 77,2 faizi boş sahə olub. Ötən ay torpaq sahələrinin ekspozisiya müddəti 0,4 faiz artaraq 253 gün təşkil edib.