Azərbaycan, Bakı, 6 may /Trend, müxbir Ü.İsmayılova/
Azərbaycanın iri sığorta şirkətlərindən biri olan "Atəşgah Sığorta" ASC Bakıda yeni nümayəndəliyini açıb. Bu barədə cümə axşamı şirkətin idarə heyətinin sədri Azər Əliyev məlumat verib.
"Şirkət Azərbaycan xalqına daha keyfiyyətli sığorta xidməti göstərmək üçün pərakəndə satış kanallarının genişləndirilməsini qarşısına məqsəd qoyub", - Əliyev deyib.
Onun sözlərinə görə, yeni nümayəndəlik sığortanın istər könüllü, istərsə də icbari satışlarını həyata keçirəcək.
"Nümayəndəliyin açılışı ilə pərakəndə xidmətin genişlənməsinə yönəldilmiş şirkətin strateji inkişafı nəzərdə tutulub", - Əliyev bildirib.
Beləliklə, "Atəşgah Sığorta" şirkətinin Bakıda fəaliyyət göstərən üç nümayəndəliyi var. Bu gün Azərbaycanda sözügedən şirkətin səkkizdən çox nümayəndəliyi fəaliyyət göstərir.
"Atəşgah Sığorta" şirkəti 1996-cı ilin sonunda yaradılıb və 1997-ci ilin əvvəlində sığorta fəaliyyəti üçün lisenziya alıb. Şirkətin səhmdarı "Norcross" şirkətinin səhmlərinin 49 faizini alan, "Kapital" sığorta qrupuna daxil olan I.S.R. Holding Ltd. şirkətidir. Səhmlərin qalan 30 faizi ARDNŞ, 21 faizi isə RAN-Eksim şirkətinə aiddir.
"Atəşgah Sığorta" Azərbaycanda "Atəşgah Həyat" adlı özünün törəmə şirkətini açan ilk şirkətdir. Şirkət I.S.R. Holding şirkətinin tərkibinə daxil olan "Atəşgah Sığorta" və "Qafqaz Sığorta"nın portfelin dəyişdirilməsi nəticəsində yaradılıb.
