Аzərbaycan, Bakı, 12 may /Trend, müxbir Ü.İsmayılova/
Mayın əvvəlində məcmu kapitalın səviyyəsi normativ tələblərinə uyğun gəlmədiyinə görə fəaliyyəti Maliyyə Nazirliyi tərəfindən dayandırılan Azərbaycanın sığorta şirkəti "Amrah Sığorta"ya lisenziya artıq ayın sonunda bərpa olunacaq. Bu barədə çərşənbə günü şirkətdən verilən məlumatda belə deyilir.
"Şirkət artıq lisenziyanın bərpası üçün Azərbaycan Maliyyə Nazirliyinə müraciət edib", - şirkətdən bildiriblər.
Mənbənin verdiyi məlumata görə, aparılan yoxlamalar nəticəsində sığorta şirkətinin məcmu kapitala uyğun tələbləri ilə bağlı anlaşılmazlıq yaranmışdı, belə ki, bu il yanvarın 1-nə olan nəticələrə əsasən, şirkətin kapitalı qrafikə uyğun olaraq iki milyon manata çatıb.
Azərbaycan Maliyyə Nazirliyinin qərarı ilə 2010-cu il mayın 7-də üç şirkətin - "Günay Sığorta", "Azal Sığorta" və "Amrah Sığorta"nın sığorta fəaliyyətinin həyata keçirilməsi üzrə lisenziyası dayandırılıb. Belə qərar sığorta qanunvericiliyi ilə müəyyən edilmiş ödəniş qabiliyyəti və sığortaçıların maliyyə sabitliyi normativlərini yerinə yetirilməsi üzrə dövlət sığorta nəzarəti orqanının göstərişlərinin yerinə yetirilməməsi ilə bağlıdır.
Bundan əvvəl, aprelin sonlarında "Azİnvest Sığorta" ASC-yə sığorta fəaliyyəti üzrə müddətsiz lisenziyanın verilməsindən imtina edilmişdi; daha doğrusu, şirkət ölkənin sığorta bazarında öz mövcudluğuna son qoymuşdu. "Sığorta fəaliyyəti haqqında" qanuna uyğun olaraq, 2010-cu il yanvarın 1-dən sığorta şirkətləri ümumi kapitalı iki milyon manatadək çatdırmalıdır.
"Ümumi kapital şirkətin malik olduğu aktivlərin dəyəri ilə xarakterizə olunur. Müvafiq olaraq, şirkətin kapitallaşması üzrə tələblərin yerinə yetirilməməsi qanunvericilikdə nəzərdə tutulan ödəniş qabiliyyətliliyi üzrə normativləri pozur", - Azərbaycan Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov "Azİnvest Sığorta"ya lisenziya verilməsindən imtinanı şərh edərkən deyib.
Nəticədə, adı çəkilən üç şirkətin fəaliyyəti dayandırılıb. Ölkənin sığorta bazarında 24 şirkət qalıb.
"Amrah Sığorta" 1993-cü ildə yaradılıb. Birinci rübdə aparılan hesablamalara əsasən, şirkətin sığorta haqqı 0,15 milyon manat təşkil edib. Şirkətin yeganə səhmdarı Amrah Bankdır.
Mayın 12-nə olan rəsmi məzənnə 0,8036 AZN/USD təşkil edir.
