Azərbaycan, Bakı, 25 iyun /Trend, müxbirlər İ.Xəlilova, N.İsmayılova/
Azərbaycan Beynəlxalq Bankı (ABB) cari ilin sonunadək 300-400 milyon dollar həcmində xarici borc cəlb etmək niyyətindədir. Bu barədə cümə axşamı bankın İdarə Heyətinin sədri Cahangir Hacıyev məlumat verib.
"Xarici kreditlərin cəlb edilməsi daimi prosesdir və bu gün bankın ümumi borcu, təxminən, 700-800 milyon dollar təşkil edir. Yaxın vaxtlarda biz "Creditwest Bank"dan 150 milyon dollar həcmində və əlavə olaraq, Amerikanın "Merrill Lynch" bankından kredit alacağıq", - Hacıyev deyib.
Onun sözlərinə görə, bu gün bankın likvidlik əmsalı 30 faizi, kapitalın adekvatlığı 12 faizi ötür. Bankın aktivləri, orta hesabla, 4 milyard dollar civarında dəyişir.
ABB birinci rübü 5 256,95 milyon manatlıq aktivlərlə başa vurub ki, bu da 2009-cu ilin analoji dövründəkindən 58,9 faiz çoxdur. Bankın xalis mənfəəti 14 517,28 min manat təşkil edir. ABB-in ümumi kapitalı 472,514 milyon manat, eləcə də nizamnamə kapitalı 240 milyon manat səviyyəsindədir. Bank aktivləri üzrə xalis mənfəətin orta qalığa nisbəti (ROA göstəricisi) 0,37 faiz, balanslaşdırılmış kapital üzrə xalis mənfəətin orta qalığa nisbəti (ROE) isə 3,13 faizdir.
ABB-də dövlətin payı 50,2 faiz təşkil edir, yerdə qalan kapital isə özəl səhmdarların səhmləri hesabına formalaşır.
