Аzərbaycan, Bakı 7 iyul /Trend, müxbir Ü.İsmayılova/
İyunda Bakının daşınmaz əmlak bazarında qiymətlər, orta hesabla, 0,4 faiz aşağı düşüb, ötən ilin analoji dövründəkindən 4,7 faiz ucuzlaşıb. Bu barədə çərşənbə günü "MBA Group" Konsaltinq Şirkətinin baş direktoru Nüsrət İbrahimov deyib.
"İyunda Bakının mənzil bazarının seqmentləri üzrə qiymət artımı müşahidə olunmayıb", - İbrahimov deyib.
İyunda Bakının ilkin mənzil bazarında qiymətlər 1 kvadratmetr üçün, orta hesabla, 799 dollara qədər aşağı düşüb. Bazarın bu seqmentində qiymətlər ötən ilin analoji dövrü və ilin əvvəlinə nisbətdə müvafiq olaraq 8,6 və 4,5 faiz azalıb.
Təkrar mənzil bazarında qiymətlər 0,8 faiz azalıb və 2009-cu ilin analoji dövrü ilə müqayisədə 12,1 faiz ucuzlaşıb. Ay ərzində qiymətlər 1 kvadratmetr üçün 1 320 dollara qədər aşağı düşüb. İl ərzində təkrar mənzil bazarında qiymətlər 7,1 faiz azalıb.
İyunda Bakının torpaq bazarında da qiymətlər 0,3 faiz azalaraq, bir sot üçün, orta hesabla, 15 704 dollar təşkil edib. Ötən ilin analoji dövrü və ilin əvvəli ilə müqayisədə qiymətlər müvafiq olaraq 12,7 və 9,6 faiz aşağı düşüb.
İyunda Bakının ticari obyektlər bazarında da qiymətlər 0,7 faiz azalaraq, 1 kvadratmetr üçün 3 297 dollar təşkil edib. Ötən il və ilin əvvəlinə nisbətdə qiymətlər müvafiq olaraq 5,2 və 3,3 faiz azalıb.
Ötən ay Bakıda mənzillərin icarəyə verilmə qiyməti 3,2 faiz azalaraq, 2 581 dollara enib, 1 il ərzində bazar seqmenti üzrə qiymətlər 13,6 faiz aşağı düşüb.
"Bakının mənzil bazarının aktivliyi aşağı səviyyədədir; belə ki, iyun ayında təkilf olunan bütün obyektlərin yalnız 11 faizi satılıb, halbuki, təklif olunan obyektlərin satışı üzrə normal aktivlik göstəricisi 40 faiz təşkil edir", - İbrahimov deyib.