Аzərbaycan, Bakı, 17 iyul /Trend, müxbir İ.Xəlilova/
"Azərbaycan Dəmir Yolları" QSC bu günlərdə şirkətin bütün aktivlərinin tam inventarizasiyasını başa çatdırıb. Bu barədə Azərbaycanın dəmiryol və ticarəti üzrə tranzitə yardım layihəsinin rəhbəri, Dünya Bankının davamlı inkişaf sektorunda infrastruktur üzrə mütəxəssis Cerald Oliver bildirib.
"Bu gün şirkət beynəlxalq maliyyə hesabatı standartlarına keçid dövründə dəmir yoluna yardım edəcək konsultasiya şirkətinin seçilməsi mərhələsindədir. Bu tədbirlər şirkətin strukturunun ticari tələblər istiqamətində dəyişilməsi çərçivəsində həyata keçirilir", - Oliver deyib.
Hələ fevralda Azərbaycan Dəmir Yolları İdarəsi QSC-yə çevrilib. Mayda isə şirkətin daxili strukturları yenidən qurularaq şöbələr departamentlərlə əvəz olunub. Vaqonlar, lokomotivlər üzrə şöbələr olduğu kimi, ticari işlər tələbatını ödəyən yük və sərnişindaşıma departamentləri də yaradılıb. Bununla yanaşı, beynəlxalq maliyyə hesabatı standartlarının tətbiqi şirkətin istənilən şöbəsində maliyyə vəziyyətini daha yaxşı öyrənməyə imkan verəcək ki, bu da onun fəaliyyətinin tam şəffaflığını təmin edəcək. Beynəlxalq ekspert belə hesab edir.
"Gələn il ərzində QSC-nin holdinqə çevrilməsinin mexanizm və müddəti üzrə ciddi müzakirələr aparılacaq, - Oliver deyib. - Bu məsələ dəmir yolunun yeni yaranmış strukturunun şəffaf və effektiv fəaliyyətinin təminatı ilə müqayisədə daha az fundamental hesab olunur".
"Onun sözlərinə görə, dünyada dəmir yolu transformasiyasının müxtəlif modelləri var. Lakin bütün hallarda daşımaların yerli spesifika, mühit və xüsusiyyətlərinə əsaslanmaq lazımdır", - Dünya Bankının eksperti hesab edir. Azərbaycanda tətbiq olunan model Aİ tərəfindən dəmir yolunun islah edilməsində uğurlu model kimi tanınan Litva modelinə yaxındır.
Onun sözlərinə görə, Azərbaycan bu prosesi digər ölkələrdə olduğundan daha tez müddət ərzində başa çatdırmaqda maraqlıdır.
Ortamüddətli perspektivdə Azərbaycan hökuməti ölkənin dəmiryol infrastrukturunun yaxşılaşdırılmasına bir milyard manat sərmayə qoymağı planlaşdırır.
Azərbaycan Prezidenti İlham Əliyevin 2010-cu il 6 iyul tarixli sərəncamı ilə Azərbaycanda 2010-2014-cü illərdə dəmiryol nəqliyyatı sisteminin inkişafı üzrə Dövlət Proqramı təsdiq olunub.
İyulun 17-nə olan rəsmi məzənnə 0,8036 AZN/USD təşkil edir.
