Azərbaycan, Bakı, 17 iyul /Trend, müxbir İ.Xəlilova/
Azərbaycanın Əmlak Məsələləri Dövlət Komitəsi "Siyəzən Broyler" Səhmdar Cəmiyyətinin səhmlərinin 99,171 faizinin satışına sərmayə müsabiqəsi elan edib.
Satışa çıxarılan layihə 85 faiz standart paketdən və müəssisə işçilərinə güzəştli satış qalığından qalan 14,171 faiz səhmlərdən ibarətdir.
Müsabiqədə həm yerli, həm də xarici sərmayədarlar iştirak edə bilərlər.
Namizədlər müəssisənin bərpasını və fəaliyyətinin genişləndirilməsini, mövcud iş yerlərinin bərpası və yenilərinin yaradılmasını nəzərdə tutan sərmayə proqramını təqdim etməlidirlər. Müsabiqə iştirakçıları sərmayə təklifinin dəyərinin 5 faizli bank zəmanətini, dövlət büdcəsinə 2,4 milyon manat ödənilməsi və Dövlət Komitəsinə ən azı 40 min manat özəlləşdirilmiş çeklər üzrə təklifləri təqdim etməlidirlər. Sərmayədarın şərt və tələblərin yerinə yetirilməsi üzrə niyyətinin ciddi olmasını təsdiq etmək üçün istənilən bankın 850 min manat məbləğində zəmanətli məktubu təqdim edilməlidir.
Namizədlər özəlləşdirmə planı ilə tanış olmaq və müsabiqə haqqında əlavə məlumat əldə etmək üçün 17 avqust 2010-cu il tarixdən etibarən Bakı ş., Y.Səfərov küç., 20 ünvanında saat 10:00-dan 17:30-dək müraciət edə bilərlər. Sənəd və təkliflər 17 avqust 2010-cu il tarixinədək saat 10:00-dan 17:30-dək qəbul edilir.
"Siyəzən-Broyler" 1985-ci ildən etibarən fəaliyyət göstərir, quş əti və yumurta istehsalında ixtisaslaşıb.
1 iyul 2010-cu il tarixinə olan vəziyyətə görə, SC-nin nizamnamə kapitalı 16737,252 min manat təşkil edir. Bundan hər birinin nominal dəyəri dörd manat olmaqla 4 184 313 səhm buraxılıb. Müsabiqənin predmetinin nominal dəyəri 16598,532 min manat olan 4 149 633 səhm təşkil edir.
Müəssisənin 5162,059 min manat məbləğində, o cümlədən mallar üzrə borcları, 4 523,132 min manat məbləğində işi və göstərilən xidmətlərə görə öhdəliyi var. Müəssisənin debitor borcu 291,251 min manatdır. Onun 1315 işçisi var.
Bu müəssisə iki il öncə əvvəlki sərmayədarla müqavilənin pozulması səbəbindən ikinci dəfədir ki özəlləşdirilir.
İyulun 17-nə rəsmi məzənnə 0,8036 AZN/USD təşkil edir.