Аzərbaycan, Bakı, 20 iyul /Trend, müxbir А.Bədəlova/
Asiya İnkişaf Bankı (AİB) 2010-cu ildə Mərkəzi Asiya ölkələrinin iqtisadi artım proqnozlarını cüzi şəkildə artırıb.
Çərşənbə axşamı bankın rəsmi saytında yerləşdirilmiş AİB-in xüsusi məruzəsində deyildiyi kimi, yaxşılaşan qlobal iqtisadi şərait, həmçinin neftə olan yüksək qiymətlər cari ilin ötən mərhələsində Mərkəzi Asiya ölkələrinin iqtisadiyyatına kömək edib.
AİB cari ildə regionun iqtisadi artımını aprel ayında bank tərəfindən proqnozlaşdırılmış 4,7 faizə nisbətdə 4,8 faiz səviyyəsində proqnozlaşdırır.
Mərkəzi Asiya regionuna Azərbaycan, Gürcüstan, Ermənistan, Qazaxıstan, Qırğızıstan, Tacikistan, Türkmənistan və Özbəkistan kimi ölkələr aiddir.
AİB Asiyanın inkişaf etməkdə olan ölkələrinin iqtisadi artım proqnozunu 2010-cu ilə 7,5 faizdən 7,9 faizə qədər artırıb. Proqnozların yenilənməsi ilin birinci rübündə, xüsusilə, ixracatın genişlənməsi və yüksək xüsusi tələbatla bağlı müşahidə olunan əhəmiyyətli artımla əlaqədardır.