Azərbaycan, Bakı, 6 avqust /Trend, müxbir N.İsmayılova/
"Parex Banka"nın Azərbaycandakı nümayəndəliyi bir ay ərzində "Parex Banka" və "Citadele banka"ya bölünəcək bankın baş ofisində struktur dəyişiklikləri ilə bağlı təkrar qeydiyyatdan keçmə prosesini başa çatdıracaq. Bu barədə cümə günü nümayəndəliyin rəhbəri Andreys Krivans bildirib.
"Nümayəndəliyimiz "Citadele banka" adını daşıyacaq. Artıq bank təkrar qeydiyyatdan keçmə prosesindədir. Proses 1 - 1,5 aya başa çatacaq", - Krivans deyib.
Bankın bölünməsi aşağıdakı prinsip üzrə aparılır: yaxşı aktivlər "Citadele banka"ya köçürüləcək, işləməyən aktivlər isə yeni bankın yaxşı balansa malik olması və sabit gəlirlə işləməsi üçün "köhnə bank"da qalacaq. "Parex banka" "Citadele banka"nı yaratmaqla öz mövqeyini Azərbaycanda qoruyub saxlayacaq.
"Citadele banka" SC "Parex banka" SC-nin restukturizasiya planı çərçivəsində yaradılan kredit müəssisəsidir və onun təsisçisi "Privatizācijas aģentūra" DSC-dir. Bu il avqustun 1-dən aktivlərin bölünməsi prosesi aparılıb və "Citadele banka" yaradılıb. "Parex banka"nın restukturizasiyası prosesində yaranan yeni bankın səhmlərinin 25 faizi Avropa Yenidənqurma və İnkişaf Bankına (AYİB) məxsus olacaq.
Dövlətin banka qoyduğu vəsaitlərin bir hissəsi olan 692 milyon lat köhnə "Parex bankа"da qalacaq, 230 milyon lat isə yeni banka keçəcək. İndiki "Parex bankа"nın səhmlərinin 76,6 faizinin sahibi dövlət, 19,7 faizinin isə AYİB-dir.
"Parex banka" 1992-ci ildə yaradılıb. Bankın nümayəndəlikləri, filialları və törəmə müəssisələri dünyanın 12 ölkəsində yerləşir. Eləcə də Berlin, Stokholm və Tallində filiallara malikdir. Azərbaycanda bankın nümayəndəliyi fəaliyyət göstərir.
Azərbaycan üzrə bankın ümumi portfeli 200 milyon dollar təşkil edir. Buraya ölkədəki törəmə lizinq strukturlarının portfeli və kredit xəttləri daxildir.
