Azərbaycan, Bakı, 21 avqust /Trend, müxbir A.Axundov/
Azərbaycanın Əmlak Məsələləri Dövlət Komitəsi investisiya müsabiqələri vasitəsilə maşınqayırma, metallurgiya və kənd təsərrüfatı sahəsində dövlət müəssisələrinin özəlləşdirilməsi üçün məsləhətçilərin cəlb edilməsinə açıq tender elan edib. Bu barədə Dövlət Komitəsinin şənbə günü rəsmi mətbuatda dərc edilən məlumatında deyilir.
Tenderdə müəssisələrin qiymətləndirilməsi və onların satışının təşkili üzrə institusional və maliyyə xidmətlərinin göstərilməsi işində uğurlu təcrübəyə malik yerli, xarici hüquqi və fiziki şəxslər iştirak edə bilərlər.
İddiaçılar tenderdə iştirak etmək üçün aşağıdakı sənədləri təqdim etməlidirlər:
- tenderdə iştirak üçün arayış;
- iştirak üçün ödənişin edilməsi haqqında bank sənədi;
- tender təklifi;
- iştirakçının tam adını, ünvanını, hüquqi statusunu, dövlət qeydiyyatından keçmiş dövlət və bank rekvizitlərini təsdiq edən sənəd (surəti);
- əsas fəaliyyət yeri;
- tender təklifinin (bank zəmanəti) təmin edilməsini təsdiq edən sənəd;
- tender təklifi imzasına hüquq verən etibarnamə;
- iddiaçının bank tərəfindən balanslaşdırılmış göstəricilər əsasında verilən son illərdəki maliyyə vəziyyəti ilə bağlı arayış (sənədə iddiaçının maliyyə vəsaitlərindən istifadə edə bilməsini təsdiq edən məlumatlar daxil edilməlidir).
İddiaçılar 2010-cu ilin avqustun 23-ü saat 17:30-dək Əmlak Məsələləri Dövlət Komitəsinin binasında Bakı şəhəri, Y.Səfərov küçəsi, 20, mənzil - 810 ünvanında əsas şərtlər paketini əldə edə bilərlər.
Bütün lazımi sənədlər (tender təklifi və tender təklifinin bank zəmanəti istisna olmaqla) Əmlak Məsələləri Dövlət Komitəsinə 27 sentyabr saat 17:30-dək təqdim edilməlidir. Tender təklifləri 6 oktyabr saat 17:30-dək qəbul edilir.
