Türkmənistan, Aşqabad, 23 avqust /Trend, müxbir H.Həsənov/
Türkmənistanın Ticarət-Sənaye Palatası və Çinin Xarici Ticarət Mərkəzi arasında əməkdaşlıq haqqında saziş hazırlanır. Bu barədə rəsmi türkmən mənbəyi məlumat verib.
Türkmənistan tərəfdən sənədin hazırlanmasına ticarət, toxuculuq və xidmətlər sektorlarına cavabdeh Baş nazirin müavini Xocaməhəmməd Məhəmmədov rəhbərlik edir.
Türkmənistan Prezidenti Qurbanqulu Berdiməhəmmədov xüsusi iclasda təqdim edilən layihəni bəyənərək qeyd edib ki, xarici tərəfdaşlarla ticari-iqtisadi sahədə əməkdaşlığın genişləndirilməsi ölkənin xarici siyasətinin ən vacib istiqamətlərindən biridir.
"Türkmənistan-Çin tərəfdaşlığı strateji, uzunmüddətli xarakter daşıyır, buna sübut kimi, müxtəlif sahələrdə həyata keçirilən birgə miqyaslı layihələri göstərmək olar", - o deyib.
Onun fikrincə, bu sənəd qarşılıqlı maraqlara cavab verən ikitərəfli iqtisadi əməkdaşlığın genişləndirilməsinə imkan verəcək.
Çin son vaxtlar Orta Asiyada öz fəaliyyətini fəallaşdırıb. 2009-cu ilin yekunlarına görə, Türkmənistanla ümumi mal dövriyyəsi, demək olar, yarım milyard dollar təşkil edib. Bu göstərici 2000-ci ilin göstəricisi ilə müqayisədə təqribən 40 dəfə artıb.
Əhəmiyyətli dərəcədə irəliləyiş Türkmənistanın şərq yataqlarından Çinə Özbəkistan və Qazaxıstan vasitəsilə çəkilən qaz kəməri layihəsinin həyata keçirilməsi ilə bağlıdır. 2009-cu ilin sonunda ÇXR uzunmüddətli müqavilə çərçivəsində türkmən qazını idxal etməyə başlayıb.
Türkmənistanda Çin kapitalının iştirakı ilə 37 müəssisə işləyir. Çin şirkətlərinin iştirakı ilə ümumi məbləği 4 milyard ABŞ dollarından və 2,5 milyard Çin yuanından çox 57 investisiya layihəsi qeydə alınıb.
ÇXR neft-qaz və telekommunikasiya sahələri layihələrində, nəqliyyat, kənd təsərrüfatı, toxuculuq, kimya, yeyinti sənayesində, tikintidə təmsil olunub.