Аzərbaycan, Bakı, 24 avqust /Trend, müxbir N.İsmayılova/
Azad İstehlakçılar Birliyi Azərbaycan Səhiyyə Nazirliyinin gigiyena orqanları nümayəndələri ilə birgə ölkənin müxtəlif regionlarında keyfiyyətsiz yodlaşdırılmamış duzun aşkar olunması məqsədilə monitorinqlər aparır. Bu barədə çərşənbə axşamı AİB-in sədri Eyyub Hüseynov TREND mətbuat mərkəzində keçirilən mətbuat konfransında bildirib.
"Hazırda AİB-in nümayəndələri Kürdəmir, Ağsu, Zərdab, Göyçay, Gəncədə monitorinqlər keçirirlər, bundan əvvəl bu cür yoxlamalar ölkənin cənub regionlarında aparılmışdı", - Hüseynov deyib.
Onun sözlərinə görə, ən pis vəziyyət Astara rayonunda qeydə alınıb.
"Yod çatışmazlığı əhali arasında zob, görmə zəifliyi, immunitet və iş qabiliyyətinin azalması kimi ciddi xəstəliklərə gətirib çıxarır", - o bildirib. - "Buna görə də Masazır, Qaradağ və Salyan kimi duz göllərindən sağlamlığa zərərli duzların qeyri-qanuni yığılması və istifadəsinə qarşı tədbirlər görmək vacibdir".
Onun sözlərinə görə, bu göllərdən qeyri-qanuni şəkildə yığılan duz ağır hesab olunur və bazara işlənilməmiş və yodlaşdırılmamış şəkildə verilir. Ona qoyulan aşağı qiymət, həmçinin, bazarda qeyri-sağlam rəqabət yaradır. "Həmin keyfiyyətsiz duz çörək və digər məhsullar istehsal edilən sexlərə böyük həcmdə göndərilir", - Hüseynov bildirib. Onun sözlərinə görə, böyük mağazalarda belə duzun satış həcmi əhəmiyyətli dərəcədə azaldılıb.
Onun sözlərinə görə, Azərbaycan bazarında dövlət orqanları tərəfindən qeydiyyatdan keçməyən obyektlərdə istehsal olunan yerli keyfiyyətsiz duzlarla yanaşı, ixrac olunan yodlaşdırılmamış duzlar da var. Hüseynovun sözlərinə görə, yodlaşdırılmış duzun istifadə müddəti doqquz ayı keçməməlidir və o, işıq düşməyən qalın qablaşdırmada saxlanılmalıdır.
"Duz Azərbaycanda yeganə məhsuldur ki, bir kiloqramının qiyməti 40 qəpik və 10 manat arası təşkil edir", - o bildirib.
Onun sözlərinə görə, AİB, həmçinin, "Azersun Holding" və Azərbaycan İnvestisiya Şirkəti tərəfindən təsis edilmiş, Azərbaycanda duz istehsal edən yeganə zavod - "Azərbaycan Duzu" İstehsalat Birliyində də müntəzəm monitorinqlər aparır.
"Bu zavodda istehsal edilən duz yodlaşdırılıb və standartlara tam şəkildə uyğundur, AİB isə daimi olaraq onun istehsal keyfiyyətinə nəzarət edir", - o bildirib.
Avqustun 24-nə rəsmi məzənnə 0,8039 AZN/USD təşkil edir.