BMK Azərbaycanın bank sektorunda konsolidasiyanı dəstəkləməyə hazırdır
Azərbaycan, Bakı, 15 sentyabr /Trend, müxbir İ.Xəlilova/
Beynəlxalq Maliyyə Korporasiyası (BMK Dünya Bankı qrupuna daxildir) Azərbaycanın bank sektorunda konsolidasiya prosesində iştirak etməyə hazırdır. Bu barədə çərşənbə günü Korporasiyanın Azərbaycandakı nümayəndəsi Aliyə Əzimova deyib.
"Biz Azərbaycan banklarının konsolidasiyası baş verəcəyi təqdirdə, onun dəstəklənməsi məsələsini nəzərdən keçirməyə hazırıq, - Əzimova bildirib. - Lakin Korporasiyaya banklardan belə təklif hələ ki daxil olmayıb".
Ölkənin bank sisteminin Avropa Yenidənqurma və İnkişaf Bankının iştirakı ilə bankların konsolidasiyası ilə bağlı artıq uğurlu praktikası var. İndiki "Unibank" 2002-ci ildə iki kommersiya bankı - "MBank" və "Promtexbank"ın birləşməsi nəticəsində yaradılıb. AYİB bu birləşmədə 15 faiz iştirak payı əldə edib. Bunun ardınca 2005-ci ildə "Bank of Baku" ASC-nin "İlkBank" ilə birləşməsi baş verib.
Azərbaycan Mərkəzi Bankı (AMB) 2010-cu ildə bankların konsolidasiyası prosesinin fəallaşmasını bildirib.
İndi AMB-nin kapitallaşma üzrə minimal tələblərinə cavab verməyən banklar bazarda az da olsa paya malik olsalar da, 2010-cu ildə Mərkəzi Bank gündəliyə bankların birləşməsi məsələsini daxil edib, əks halda gələcəkdə sistemdən tələblərə uyğun olmayan bankların çıxarılması məsələsinə baxıla bilər.
"Bank olmayan kredit təşkilatları haqqında" qanunun qüvvəyə minməsi ilə əlaqədar olaraq, bu kateqoriyalı banklara bank olmayan kredit təşkilatlarının (BOKT) mülkiyyət formasının dəyişdirilməsi təklif oluna bilər. "Kapitalın möhkəmləndirilməsi məqsədilə konsolidasiyaya razı olmayan banklara BOKT-a çevrilmək təklif olunacaq", - bundan əvvəl Mərkəzi Bankın İdarə Heyətinin sədr müavini Alim Quliyev deyib.
AMB-nin statistik məlumatlarına görə, 2010-cu il avqustun 1-nə 41 bankın kapitalı 10 milyon manatı ötüb. Bir ay əvvəl bankların sayı 42 olub. Buna uyğun olaraq, bu kateqoriyalı bankların ümumi kapital həcmində xüsusi çəkisi 98,4 faizdən 97,8 faizədək azalıb.
Hazırda ölkədə 47 bank fəaliyyət göstərir. Onların 23-ü xarici kapitalın iştirakı ilə fəaliyyət göstərir.
Sentyabrın 15-nə olan rəsmi məzənnə 0,8035 AZN/USD təşkil edir.
