Azərbaycan, Bakı, 27 sentyabr /Trend, müxbir А.Axundov/
Azərbaycanın sığorta şirkəti "Paşa Sığorta" 2010-cu ilin sonuna qədər həyatı sığortalamaq üzrə şirkət yaratmağı planlaşdırır. Bu barədə bazar ertəsi şirkətin idarəetmə heyətinin sədri Nofəl Rzayev deyib.
"Paşa Holdinq"in üçillik strateji sığorta biznesi planına əsasən, 2010-cu ilin sonuna qədər həyatın sığortalanması üzrə şirkətin yaradılması planlaşdırılır", - Rzayev deyib.
Onun sözlərinə görə, planın gerçəkləşmə qrafikində bununla bağlı heç bir dəyişiklik yoxdur.
Maliyyə Nazirliyindən verilən məlumata görə, "Paşa Holdinq"dən həyatın sığortalanması üzrə şirkətin yaradılması barədə artıq birinci müraciət daxil olub.
Prosedurlara əsasən, şirkətin yaradılmasına icazə sığorta şirkətinin qanunvericiliyə uyğun sənədlərinin baxılmasndan sonra veriləcək. Rzayevin sözlərinə görə, hazırda beş nəfər aparıcı sığorta şirkəti və Almaniyanın həyatı sığortalama şirkətlərində təcrübə keçir.
"Təcrübə iki həftədən sonra başa çatacaq", - Rzayev deyib.
Onun sözlərinə görə, "Life-şirkət"in təsisçisi "Paşa Holdinq" olacaq.
20 mln manatlıq kapitala və 28 milyon manatlıq aktivlərə malik "Paşa Sığorta" şirkəti korporativ və fərdi müştərilərə sığortanın 31 növü üzrə xidmət göstərir. "Paşa Sığorta" sığorta məhsulları və xidmətlərinin keyfiyyətli idarə olunmasının beynəlxalq standartlara uyğun gəlməsinə görə, "Moody" agentliyi tərəfindən sertifikat alıb. Ötən ilin yekunları üzrə kapitallaşmanın həcminə görə, şirkət bazar liderlərinin üçlüyünə daxil olub və sığorta haqlarının yığılması üzrə ölkənin aparıcı sığortaçılarının onluğunda mövqeyini möhkəmləndirib.
Sentyabrın 27-nə olan rəsmi məzənnə 0,8029 AZN/USD təşkil edir.
