Azərbaycan, Bakı, 13 oktyabr /Trend, müxbir N.İsmayılova/
Azərbaycan Vergilər və Maliyyə nazirliklərinin əməkdaşları Makedoniyanın Xarici İşlər və Maliyyə nazirliklərinin nümayəndələri ilə iki ölkə arasında gəlir və əmlaka ikili vergiqoyma haqqında konvensiya layihəsinin hazırlanması üzrə danışıqların aparılması məqsədilə Makedoniyanın paytaxtı - Skopye şəhərinə səfər ediblər. Bu barədə Azərbaycan Vergilər Nazirliyinin "Vergilər" qəzetində nəşr olunmuş məlumatda deyilir.
Məlumatda deyildiyi kimi, nümayəndə heyətləri arasında danışıqlar uğurla keçib, nəticədə, layihənin bütün istiqamətləri üzrə razılaşma əldə olunub.
Danışıqların yekunları üzrə protokol imzalanıb. Sənədi Azərbaycan tərəfdən - Vergilər Nazirliyinin Beynəlxalq münasibətlər idarəsinin rəhbəri İlqar Əkbərli, Makedoniya tərəfdən - Maliyyə Nazirliyinin vergi şöbəsinin rəhbəri Borçe Smilevski imzalayıblar.
Bu günə Azərbaycan 40 ölkə ilə ikili vergiqoyma haqqında saziş imzalayıb, onlardan 36-sı artıq qüvvəyə minib.
