Azərbaycan, Bakı, 19 oktyabr /Trend, müxbir N.İsmayılova/
Azərbaycanda dinamik inkişaf iqtisadiyyatın bütün sektorlarını əhatə edir və bu inkişaf nəticəsində son yeddi ildə ölkədə 900 mindən artıq yeni iş yeri açılıb. Bu barədə çərşənbə axşamı əmək və əhalinin sosial müdafiəsi nazirinin müavini Natiq Məmmədov bildirib.
"Ölkədə regionların sosial-iqtisadi inkişafı proqramı çərçivəsində də yeni iş yerləri yaradılır, əhalinin məşğulluğunun səmərəliliyi artırılır. Son illər Azərbaycan dünya birliyinə inteqrasiya olunur, ona görə də ölkədə peşəkar kadrların olması vacibdir", - Məmmədov bildirib.
Onun sözlərinə görə, son illər dünyada əmək miqrasiyası prosesləri fəallaşıb və Azərbaycan artıq əmək miqrasiyası təyinatlı ölkəyə çevilib. Buna ölkədəki sosial-iqtisadi inkişaf və siyasi sabitliyin hesabına nail olunub. Nazir müavininin sözlərinə görə, bu, həmçinin, xarici investorların ölkədə yeni iş yerlərinin açılmasında marağının artmasına da kömək edib.
"Əgər 2003-cü ildə ölkədə işsizlik 19 faiz təşkil edirdisə, bu gün onun səviyyəsi 11 faizədək azalıb", - Məmmədov bildirib.
Onun sözlərinə görə, 2008-ci ildə Azərbaycanda leqal əmək miqrantlarının sayı 4 700 nəfər idisə, cari ilin 9 ayının yekunları üzrə onların sayı 7 min nəfərdən çox artıb.