Azərbaycan, Bakı, 29 oktyabr /Trend/
Avropa Yenidənqurma və İnkişaf Bankı 2010-cu ildə Azərbaycanda ÜDM-in dördfaizlik artımını proqnozlaşdırır. Bu barədə bankın AYİB-in əməliyyat ölkələrində regional makroiqtisadi perspektivlər üzrə hesabatında deyilir.
İyulda bank cari il üçün ÜDM-in analoji artımını proqnozlaşdırıb. Lakin 2011-ci il üçün proqnoz azaldılaraq yenidən baxılıb. Bankın yenilənən proqnozlarına əsasən, 2011-ci ildə Azərbaycanda ÜDM-in artımı 2,5 faiz təşkil edəcək. İyulda verilən proqnozda bu artım 4 faiz göstərilmişdi.
Beynəlxalq Valyuta Fondu (BVF) özünün oktyabrdakı "Yaxın Şərq və Mərkəzi Asiya: regional iqtisadiyyatın inkişaf perspektivləri" məruzəsində 2010-cu ildə Azərbaycan üçün real ÜDM-in artım proqnozunu əvvəllər proqnozlaşdırılan 2,7 faiz əvəzinə 4,3 faizədək artırıb. 2011-ci il üçün ölkədən ÜDM-in artım proqnozu 0,6 faizdən 1,8 faizədək, 2015-ci il üçün 0,7 faizdən 0,9 faizədək artıb.
Asiya İnkişaf Bankı, öz növbəsində, 2010-cu ildə Azərbaycan üçün ÜDM-in artım tempini 3,8 faiz, 2011-ci il üçün 3,5 faiz səviyyəsində proqnozlaşdırır.
Azərbaycan Dövlət Statistika Komitəsinin məlumatına görə, 2009-cu ildə ölkənin ÜDM artımı 9,3 faiz təşkil edib, 2010-cu ildə ölkə hökuməti 5,8 faiz, 2011-ci ildə 3,8 faiz səviyyəsində artım gözləyir.
AYİB 2010-cu ildə bütün Şərqi Avropa və Qafqaz regionu ölkələrində müsbət artım proqnozlaşdırır. İqtisadi artım proqnozları xarici tələbatın artması, xammalın qiyməti, eləcə də region ölkələrinə beynəlxalq dəstəyin (Azərbaycan istisna olmaqla, bütün region ölkələri BVF ilə maliyyə dəstəyinin alınması üçün danışıqlar aparıblar) göstərilməsi ilə əlaqədardır.
AYİB - vəsaitləri Mərkəzi Avropa və Mərkəzi Asiyanın 30 ölkəsində bazar iqtisadiyyatı və demokratiyanın qurulması məqsədilə istifadə olunan bankdır. Onun sahibi 61 ölkə və iki beynəlxalq təşkilatdır. AYİB Azərbaycanda, ümumilikdə, 114 layihənin həyata keçirilməsinə 1,05 milyard avro investisiya qoyub. Onlar üçün, orta hesabla, 5,6 milyard avro maliyyələşdirmənin cəlb edilməsi təşkil olunub. Hazırda AYİB-in cari portfeli 663 milyon avro təşkil edir. Onun 69 faizindən artıq istifadə olunub. Bununla yanaşı, istifadə edilən kreditlərdən 283,4 milyon avro ödənilib.
