Mehmanxana və turizm şirkətlərinin əməkdaşlığı Azərbaycanda turizm sektorunun inkişafına yardım edəcək
Azərbaycan, Bakı, 29 oktyabr /Trend, müxbir A.Axundov/
Mehmanxana və turizm şirkətlərinin əməkdaşlığı Azərbaycanda turizm sektorunun inkişafına kömək edəcək. Bu barədə Turizm Assosiasiyasının sədri Nahid Bağırov turizm şirkətləri və mehmanxana nümayəndələrinin iştirakı ilə keçirilən "dəyirmi masa"da deyib.
Görüşdə turizm şirkətləri və mehmanxanaların əməkdaşlıq məsələləri, bu əməkdaşlığın perspektiv və problemləri, eləcə də təşkilati məsələlər müzakirə olunub.
Görüş zamanı turizm şirkətlərinin nümayəndələri xarici turizm şirkətlərinin yerli mehmanxanalarla razılığa gələrək, müştərilər üçün yerli şirkətlərə nisbətdə daha aşağı turist qiymətlərini ala bilmələri ilə bağlı narazılıqlarını bildiriblər.
Öz növbəsində, mehmanxanalar yerli turizm şirkətləri üçün qiymətlərin azaladılması zamanı ödənilən komisyonların məbləğini azaltmaq və ya ümumiyyətlə onları ödəməməyi təklif edirlər. Mehmanxana nümayəndələrinin sözlərinə görə, turizm şirkətləri il ərzində onları müştərilərlə təmin etmirlər.
Turizm şirkətlərinin nümayəndələri də mehmanxanalarda marketinq şöbələrinin turizm şirkətlərinin funksiyalarını yerinə yetirmələri ilə bağlı narazılıqlarını bildiriblər.
Yuxarıda göstərilən problemlərin həlli üçün "dəyirmi masa" iştirakçılarına bəzi təkliflər bildirilib.
"Enctours" turizm şirkətinin idarəedici direktoru Emil Nəsibovun sözlərinə görə, mehmanxanaların turizm şirkətləri üçün qiymətləri şirkətlərin təqdim etdikləri turistlərin sayından, eləcə də mövsümdən asılı olaraq müəyyən etmələri məqəsədəuyğun olardı. Onlar üçün yerli mehmanxanalarda xarici şirkətlər tərəfindən yerlərin bronlaşdırılmasına verginin tətbiqi və yerli şirkətlərin belə vergidən azad edilməsi təklifi də səsləndirilib.
Müzakirələrin yekununa əsasən Turizm Assosiasiyasının və Azərbaycan mehmanxanalarının birləşdirilməsi haqqında qərar qəbul edilib.
Assosiasiyanın gələcək fəaliyyəti üçün əsas kimi cümə günü turizm agentliklərinin və mehmanxanaların qarşılıqlı əməkdaşlığı hqqqında birgə memorandum qəbul edilib.
"Azərbaycana turist axının artırılması və turizm şirkətlərinin işinin stimullaşdırılması üçün yerli mehmanxanalar və turizm şirkətləri arasında müqavilənin bağlanması məqsədəuyğundur. Orada mehmanxanalara turizm şirkətləri üçün güzəştli turist qiymətlərinin verilməsi nəzərdə tutulub", - memorandumda deyilir.
Sənədə əsasən, turizm şirkətləri əməkdaşlıq etdikləri hotellərin maraqlarını qorumalı, yerli və xarici sərgilərdə hotellərin reklamını təşkil etməlidirlər.
"Dəyirmi masa"nın yekunları üzrə qarşılıqlı problemlərin həll edilməsi üçün işçi qrupunun yaradılması barədə qərar qəbul edilib. İşçi qrupuna hər birindən 2 nümayəndə olmaqla, Hyatt və Radisson Blu mehmanxanalarından, "Enctours" və "Eurotour" turizm şirkətlərindən nümayəndə, eləcə də Azərbaycan Turizm Assosiasiyasının sədri Nahid Bağırov daxil olacaq.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyətinin üzvlərinə "Improtex Travel", "Caspian Travel", "Pasha Travel", "Silkway Travel", "Euroturizm" şirkətlərinin rəhbərləri daxildir. Bu gün 51 turizm şirkəti assosiasiyanın üzvüdür.
Assosiasiyanın əsas fəaliyyət istiqamətləri:
- turizm şirkətlərinin maraqlarının qorunması;
- qanun layihələrinin işlənib-hazırlanması, milli turizm şirkətinin yaradılmasına yardım;
- bazar iştirakçıları üçün təlim və seminarların keçirilməsi üzrə plan hazırlanması;
- Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması;
- daxili turizmin inkişafı və dünya bazarında turizm məhsullarının təqdim olunması.
Həmçinin, fəaliyyət istiqamətlərinə:
- konqres turizminin inkişafı və tətbiqi;
- idarəetmə və xidmət sahəsində peşəkar kadrların hazırlanmasına yardım;
- turizm sahəsində adekvat vergi qoyuluşunun yaradılması və normativ nizamlamalar;
- standartlaşdırma, sertifikatlaşdırma və lisenziyalaşdırmanın inkişafına yardım;
- beynəlxalq turizm şirkətləri ilə əməkdaşlıq;
- rəsmi nəşriyyat orqanının yaradılması;
- hüquqi məsləhətləşmələr sahəsində xidmətlər;
- normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.
