Azərbaycan, Bakı, 1 dekabr /Trend, müxbir N.İsmayılova/
Dünya maliyyə böhranı şəraitində bütün ölkələr milli mənzil maliyyələşdirməsi proqramlarının dəqiqləşdirilməsinə ehtiyac hiss edirlər, ona görə də Azərbaycanda ipoteka kreditlərinin verilməsi şərtləri də dəqiqləşdiriləcək. Bu barədə çərşənbə günü Azərbaycan Mərkəzi Bankının idarə heyətinin sədri Elman Rüstəmov bildirib.
Noyabrda Mərkəzi Bank yanında fəaliyyət göstərən Azərbaycan İpoteka Fondu (AİF) ipoteka kreditlərinin verilməsi şərtlərini dəyişdirib. Nəticədə adi ipoteka kreditləri üçün ödənişin ilkin məbləği 15 faizdən 20-dək artırılıb.
"Bankların, digər maliyyə institutlarının və AİF-in verilən kreditlərlə bağlı problemlə üzləşməməsi üçün ipoteka kreditlərini ölkənin iqtisadi baxımdan fəal əhalisi almalıdır", - Rüstəmov bildirib.
Onu sözlərinə görə, hazırda G20 ölkələrinin fəal müzakirə etdikləri ipoteka kreditləşdirməsini nizamlama sistemi yaradılır və bunula bağlı artıq beynəlxaq qurumlara müvafiq tapşırıqlar verilib.
"Azərbaycan öz növbəsində mövcud təcrübədən istifadə edərək qabaqlayıcı tədbirlər həyata keçirir, çünki ipoteka sisteminə etimad itməməlidir. Çünki o, ölkənin bank sektoru üçün çox önəmlidir", - Rüstəmov bildirib.
Onun sözlərinə görə, bu günədək Azərbaycanda ipoteka kreditləri ilə bağlı heç bir problem olmayıb. "Bu isə o deməkdir ki, doğru yoldayıq", - Rüstəmov bildirib.
Azərbaycanda AİF-in xətti ilə adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə maksimum 25 il müddətinə verilir. Sosial ipoteka 35 min manat təşkil edir və dörd faiz dərəcə ilə maksimum 30 il müddətinə verilir. Adi və güzəştli kreditlər üçün ilkin ödəniş 15 faizdir.
Kreditlər milli valyuta - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir, kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı, üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
Hazırda fondun xətti ilə AİF-in agent bankları vasitəsilə 240 milyon manat məbləğində 6 minə yaxın kredit verilib.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
Dekabrın 1-nə rəsmi məzənnə 0,8003 AZN/USD təşkil edir.
